=एजेन्सी,कात्तिक ९
एएफसी यू–१९ च्याम्पियनसिप छनोटमा नेपालले भारतलाई २–० ले पराजित गरेको छ । शुक्रबार थाइल्याण्डस्थित चोनबुरी रंगशालामा भएको खेलमा फरवार्ड रेखा चम्केपछि भारतलाई २–० ले पराजित गर्न सफल भएको हो । नेपालको जितमा फरवार्ड रेखा पौडेलले दुई गोल गरिन् ।
निकै प्रतिस्पर्धात्मक खेलको पहिलो हाफ गोलरहित बराबरीमा सकिएको थयो । दोस्रो हाफको ५९ औं मिनेटमा रेखाले नेपाललाई अग्रता दिलाइन । नेपालको हाफबाट गरेको लामो क्लिएरेन्समा विपक्षी डिफेन्डरले बनाएको अफसाइड ट्रयापलाई बिट गर्दै रेखाले पेनाल्टी क्षेत्र भित्रबाट गोल गरेकी थिइन् ।
दुवै टोलीले त्यसपछि गोल गर्ने अवसर पाएपनि त्यसलाई सदुपयोग गर्न सकेनन् । तर रेखाले खेलको २ मिनेट समय बाँकी छंदा नेपालको अग्रता दोब्बर पार्दै नेपाललाई जित दिलाईन् । उनले गोलरक्षकको टाउको माथिबाट चिप गोल गर्दै नेपालको जित पक्का गरिन् ।
प्रतियोगिताको पहिलो खेलमा नेपाल थाइल्याण्डसँग ३–० ले पराजित भएको थियो । यता पाकिस्तानलाई १८–० ले हराउँदै भारतले उत्कृष्ट सुरुवात गरेको थियो । प्रतियोगिताको अर्को खेलमा आजै थाइल्याण्ड र पाकिस्तान भिड्दैछन् । नेपालले आइतबार समूहको अन्तिम खेलमा पाकिस्तानको सामना गर्नेछ ।
यस समूहबाट शीर्ष स्थानको टोली र दोस्रोमध्ये उत्कृष्ट दुईमा पर्ने टोलीले थाइल्याण्डमा हुने यू–१९ च्याम्पियनसिपको अन्तिम चरणमा छनोट हुनेछ । तर थाइल्याण्ड शीर्ष स्थानमा पारेको खण्डमा भने दोस्रो हुने टोली छनोट हुनेछ । नेपालको यस जितसँगै छनोट हुने सम्भावना बढेको छ । नेपाल पहिलो पटक यू–१९ च्याम्पियनसिपको छनोटमा सहभागिता जनाउँदै गर्दा अन्तिम चरणमा छनोटनजिक पुगेको हो ।
