विराटनगर, कार्तिक ९
विराटनगरमा दुई दिनदेखि जारी प्रथम कालुराम सरजमल स्मृति ब्याटमिन्टन प्रतियोगिता शुक्रबार सम्पन्न भएको छ । मोरङ जिल्ला ब्याटमिन्टन संघको आयोजनामा विराटनगरस्थित कर्भड हलमा खुला ब्याटमिन्टन प्रतियोगिता आयोजना गरिएको थियो । प्रतियोगितामा (४० वर्ष माथि)का मेन्स डबल्स र माष्टर डबल्सका दुई इभेन्टमा खेल भएको थियो ।
प्रतियोगितामा मोरङ र सुनसरीका ६६ खेलाडीको सहभागिता रहेको थियो । प्रतियोगिताको मेन्स डबल्समा सुनसरीका सुदर्शन गुरुङ र सविन खनालको जोडी प्रथम, विराटनगरका विनोद डाँगी र शशि चौधरीको जोडी द्वितीय, पथरीका हेम गुरुङ र विकास श्रेष्ठ तथा विराटनगरका यसवन्त विक्रम साह र सन्दीप श्रेष्ठको जोडी तृतीय भए ।
त्यस्तै माष्टर डबल्समा विराटनगरका सन्दीप श्रेष्ठ र यसवन्त विक्रम साहको जोडी प्रथम, पथरीका पदमबहादुर धिमाल र विकास श्रेष्ठको जोडी द्वितीय, विराटनगरका किरणसिंह बस्नेत र विनोद डाँगी तथा विराटनगरकै ज्ञानेन्द्र भट्टराई र डाक्टर मनोज लाखेको जोडी तृतीय भए । प्रतियोगिताका प्रथम हुनेले नगद १५ हजार, द्वितीयले नगद १० हजार र तृतीयले ५–५ हजार रुपैयाँ पुरस्कार प्राप्त गरे ।
