ललितपुर ,कात्तिक ११
ललितपुरमा जारी यु–१५ साफ च्याम्पियनसिपमा नेपाल यूवा फुटबल टोली एक खेल अगावै सेमिफाइनलमा पुग्न सफल भएको छ ।
समूह ‘ए’ को शनिबार भएको खेलमा बंगलादेशलले माल्दिभ्समाथि ९–० को फराकिलो जित दर्ता गरेपछि नेपालले एक खेल अगावै अन्तिम चारमा स्थान बनाउन सफल भएको हो । नेपालले पहिलो खेलमा माल्दिभ्सलाई ४–० गोलले हराएको थियो ।
माल्दिभ्सलाई पराजित गरेको बंगलादेश पनि अन्तिम चारमा पुग्न सफल भयो । लगातार दोस्रो हार बेहोरेपछि माल्दिभ्स प्रतियोगिताबाट बाहिरिएको छ ।
अब नेपाल र बंगलादेशबीच समूह विजेताको लागि प्रतिस्पर्धा हुनेछ । नेपाल र बंगलादेशबीचको खेल सोमबार हुनेछ ।
शुक्रबारै भएको समूह ‘बी’ को खेलमा पाकिस्तानले भुटानलाई ४–३ ले पराजित गर्दै अन्तिम चारमा स्थान सुरक्षित गरेको छ । पाकिस्तानले पहिलो खेलमा भारतलाई २–१ ले पराजित गरेको थियो ।
अब भारत र भुटानबीचको विजेताले समूह ‘बी’ बाट उपविजेताको रुपमा सेमिफाइनलमा स्थान बनाउनेछ ।
