विराटनगर, कात्तिक ११
विराटनगरमा यही कात्तिक २७ गते ‘म्युजिकल फेस्ट २०७५’ हुने भएको छ । ३ पटक सम्म सफलता पूर्वक आयोजना भइसकेको ‘म्युजिकल फेस्ट’को चौथो संस्करण द ग्रिन लिफ ब्याण्ड र विराट फ्रेण्डस् क्लवको आयोजनामा हुने भएको हो ।
‘म्युजिकल फेस्ट’मा राष्ट्रिय कलाकार तथा चर्चित ¥यापर आशिष राना (लाहुरे) तथा द स्मृति व्याण्ड, द ग्रिन ग्रिन लिफ व्याण्ड, गरिमा डान्स सेन्टर धरानका कलाकारहरुको प्रस्तुती रहने विराटनगरमा आयोजित पत्रकार सम्मेलनमा आयोजकले जानकारी दिएको छ ।
विराटनगर– १ शान्तिचौकमा जिल्ला प्रहरी कार्यालय मोरङको नजिकै रहेको खुल्ला मैदानमा हुने सो म्युजिक फेस्टमा प्रवेश शुल्क नलाग्ने आयोजकले जनाएको छ । दशैँ तिहार र छठ जस्ता चाडपर्वको समय पारेर आयोजना गरिँदै आएको म्युजिकल फेस्टले सामाजिक सद्भाव बढाउन महत्वपूर्ण सहयोग गर्ने अपेक्षा रहेको कार्यक्रम ब्यवस्थापक तथा संयोजक सन्तोष महत(स्यान्ट्रो)ले बताए ।
उनले कार्यक्रमको अनुमानित लागत ५ लाख रहेको बताउँदै विराटनगरमा फ्रि कन्सर्ट गर्नु चुनौतीपुर्ण रहेको बताए । कार्यक्रम कात्तिक २७ गते मंगलबार बेलुका ५ बजेदेखि १० बजेसम्म हुने छ । म्युजिकल फेस्टको गएको संस्करणमा पनि सुगम पोखरेल लगायतका अन्य राष्ट्रिय कलाकारहरुले बेजोड नृत्य तथा सांगितिक प्रस्तुती दिएका थिए ।
