काठमाडौँ,कात्तिक ११
नेपाली चलचित्र ‘छक्का पञ्जा’ले बनाएको रकर्ड सोही निर्माण टिमले बनाएको ‘छक्का पन्जा ३’ल तोडेको छ । सर्वाधिक कमाई गर्ने नेपाली चलचित्रको रुपमा ११८ दिन लगाएर बनाएको रकर्ड छक्का पञ्जा ३ ले १७ दिनमै तोडेको हो ।
छक्का पन्जा ३ दसैंको घटस्थापनाको दिनबाट रिलिज भएको थियो ।चलचित्रलाई यस वर्षकै प्रतीक्षित चलचित्रका रुपमा हेरिएको थियो । अपेक्षा गरे अनुरुप चलचित्रले दर्शकको माया पाइरहेको छ । यो चलचित्रले घटस्थापनाको दिनदेखि अहिलेसम्म पनि उस्तै व्यापार गरिरहेको छ ।
यो युनिटले निर्माण गरेका अघिल्ला चलचित्रहरुले पनि विभिन्न रेकर्डहरु राख्दै आएको छ । अझ भनौं चलचित्र बजारको व्यापारमा यो ब्यानरले सनसनी नै मच्चाउने गरेको छ ।फूलपातीबाट रिलिज भएको असोक शर्मा निर्देशित चलचित्र जय भोले प्रदर्शनमा आएसँगै यो चलचित्रको व्यापार ओरालो लाग्न सक्ने धेरैको अड्कल थियो । तर चलचित्रलाई फूलपातिबाट रिलिज भएको जय भोलेले पनि कुनै असर गरेको छैन ।
छक्का पन्जा ३ ले रिलिज भएको १७ दिनमा बक्स अफिसमा चलचित्र इतिहासकै सम्मानित व्यापार गरेको छ ।चलचित्र रिलिज भएको १८ औं दिनसम्मको उपत्यकाबाहिर र भित्र दुवैको व्यापारलाई जोडेर हेर्दा १० गतेसम्ममा चलचित्रले करिब १६ करोड ४ लाखको व्यापार गर्न सफल भएको देखिन्छ ।
यसै अवस्थामा चलचित्रले व्यापार गरेको खण्डमा करिब २० लाखभन्दा माथि व्यापार गर्नेमा आशावादी रहेको निर्माता दिपकराज गिरीले बताए । अघिल्ला चलचित्रहरुलाई विषयवस्तुमा दोषी देखाउने गरिएको थियो । चलचित्रले कुनै सन्देश दिन नसकेको आरोप लाग्ने गरेको थियो ।
तर यसपटक चलचित्रमा उठान गरिएको कथा वस्तुलाई दर्शकले राम्रो रुचाएका छन् ।दीपाश्री निरौलाको निर्देशनमा निर्माण भएको चलचित्र छक्का पञ्जा ३ मा दिपकराज गिरी, केदार घिमिरे, जितु नेपाल, बुद्धि तामाङ, विल्सन विक्रम राई, दीपिका प्रसाईं, नीर शाह लगायतका कलाकारहरुको मुख्य भूमिका रहेको छ ।
