काठमाडौं,कात्तिक १३
ललितपुरमा जारी साफ यु–१५ फुटबल च्याम्पियनसिपको सेमिफाइनलमा नेपालले पाकिस्तान सँग खेल्ने भएको छ । सोमबार बंगलादेशसँग २–१ ले पराजित भएसँगै नेपाल समूह ‘ए’ को उप विजेता बनेपछि नेपालले पाकिस्तान प्रतिद्वन्द्वी पाएको हो ।
सातदोबाटोस्थित एन्फा कम्प्लेक्सको खेल मैदानमा सोमबार भएको खेलमा बंगलादेशले खेलको शुरुवातमै मोहम्मद आहाद सकिलको गोलबाट अग्रता बनाएको थियो । ३६औं मिनेटमा जान लिम्बुले पेनाल्टीमार्फत गोल गर्दै खेललाई १–१ गोलको बराबरीमा ल्याएका थिए ।
बंगलादेशका गोलरक्षक मितुल मार्माले राकेश विश्वकर्मालाई फल गरेपछि नेपालले पेनाल्टीको मौका पाउदा रेफ्रीले गोलरक्षकलाई सोझै रातो कार्ड देखाएर मैदान बाहिर पठाएका थिए । तर, १० खेलाडीमा समेटिएपनि नेपालले फेरि दोस्रो हाफको शुरुवातमै गोल खान पुग्यो । बंगलादेशका हवल्दारले गोल गरेका थिए । त्यसपछि नेपालले पटकपटक पोस्ट आक्रमण बुनेपनि गोल गर्न असमर्थ रहँदा पराजित हुन पुग्यो ।
सोमबार नै भारतले भुटानलाई ४–० ले पराजित गर्दै अन्तिम चारमा पुग्न सफल भयो । सेमिफाइनलका खेल बुधबार हुनेछ । पहिलो सेमिफाइनलमा समूहको विजेता बंगलादेश र समूह ‘बी’ को उपविजेता भारतबीच खेल हुनेछ । दोस्रो सेमिफाइनलमा समूह ‘बी’ को विजेता पाकिस्तान र समूह ‘ए’ को उपविजेता नेपालबीच खेल हुनेछ ।
