विराटनगर,कात्तिक १३
नेपाल विद्युत प्राधिकरणले मोरङमा विद्युत चोरी गर्ने २० जनालाई पक्राउ गरिएको छ । प्राधिकरणको विराटनगर वितरण केन्द्रले हुकिङ गरेर विद्युत चोरी गरिरहेका उनीहरुलाई पक्राउ गरेर कारवाही प्रक्रिया अघि बढाएको हो ।
वितरण केन्द्र प्रमुख राजीव सिंहका अनुसार उनीहरुबाट अनुमानित २ लाख ५० हजार रुपैयाँ जरिवाना असुल गरिने छ । उनीहरु हुकिङ गरेर विद्युत चोरी गरिरहेको अवस्थामा पक्राउ परेका उनले जानकारी दिएका छन् ।
ससस्त्र र जनपथ प्रहरीसहित गस्तीमा गएको टोलीले मध्य रातमा वितरण केन्द्र अन्तर्गत पर्ने ग्रामथाम गाउँपालिकाका विभिन्न गाउँबाट चोरीमा संलग्न स्थानीयलाई पक्राउ गरेको हो ।
उनीहरुलाई जिल्ला प्रहरी कार्यालय मोरङमा थुनामा राखिएको छ । उनीहरुलाई भविश्यमा विद्युत चोरीमा संलग्न नहुने सर्तमा जरिवाना असुल गरेर छोडिने वितरण केन्द्रले जनाएको छ ।
केन्द्रले गत कात्तिक ७ गते पनि १८ जनालाई पक्राउ गरी कारवाही गरेको थियो । वितरण केन्द्र अन्तर्गत अहिले १२.६८ प्रतिशत विद्युत चुहावट हुँदै आएको छ ।
