विराटनगर, कात्तिक १४
बालबालिकालाई खुवाइने भिटामिन ए तथा जुकाको औषधि खुवाउने कार्यक्रमलाई विराटनगर महानगरले अन्यठाउँ भन्दा फरक कार्यक्रम गरी मनाउदै छ ।
यही कार्यक्रम र समयको सदुपयोग गर्दे महानगरले बच्चाको नाप लिएर कुपोषित बालबालिकाको पहिचान र बालभिटा बितरण समेत गर्न थालेको छ ।
विराटनगर महानगरका मेयर भीम पराजुलीले समयको सदुपयोग गर्दे यही समयमा बच्चाको नापलिने तथा कुपोषित बालबालिकालाई पहिचान समेत गर्ने काम भएको जानकारी दिए ।
नगरभित्र बालबालिकामा हुने समस्या समाधानका लागि महानगरले बालबालिका सम्बन्धि सेवा बिस्तार गर्ने पराजुलीले बताए । कुपोषित पहिचान भएका र तौलमा तलमाथी भएका बालबालिकालाई उचित सरसल्लाह र रिफर्र गरिने विराटनगर नगर स्वास्थ्य सहसंयोजक लोजिता योन्जनले जानकारी दिइन् ।
कुपोषित बालवालिकालाई कोशी अञ्चल अस्पताल र रानी प्राथमिक स्वास्थ्य केन्द्रमा पठाइने छ । रिफर गरिएको संख्या भने केहिदिनपछि मात्रै थाहाँ हुने नगर स्वास्थ्य सह संयोजक योन्जनको भनाई छ । यस्तै विराटनगर महानगरले बालवालिकाहरुलाई बालभिटा समेत वितरण गरेको छ ।
स्वास्थ्य तथा जनसंख्या मन्त्रालयको नियमित कार्यक्रमअनुसार बुधवार र विहिवार ६ महिनादेखि ५ वर्षसम्मका बालबालीकाका लागि भिटामिन ए खुवाइदै छ । यस्तै एकदेखि ५ वर्षसम्मका बालबालिकालाई जुकाको औषधि पनि खुवाइदै छ ।
