एजेन्सी,कात्तिक १७
तालिवान लडाकुका ‘गडफादर’ मानिने मौलाना समी उल हकको पाकिस्तानमा हत्या भएको छ । जमियत उलेमा ए–इस्लामका शाखा प्रमुखसमेत रहेका मौलानाको रावलपिन्डीस्थित घरमै हत्या भएको हो ।
मौलानालाई पाकिस्तानमा तालिवानको जनक मानिन्थे । उनी एक प्रभावशाली धर्म गुरु थिए जसबाट हजारौं तालिबान लडाकुले तालिम लिएका थिए ।
रावलपिन्डीको बहरिया टाउनमा सफारी वन भिलाज इलाकाको घरमा एक्लै भएका बेला अज्ञात समूहले छुरा प्रहार गरी हत्या गरेको रावलपिन्डी प्रहरीले जनाएको छ ।
मौलाना समी उल हकको उमेर ८० वर्षभन्दा बढी भएको बताइएको छ । उनी सन १९८८ मा दारुल उलुम हक्कानियाको अध्यक्ष बनेका थिए ।यही मदरसाबाट हजारौं तालिवान लडाकुले इस्लामी शिक्षा हासिल गरेका थिए ।
राजनीतिक विश्लेषकहरुले उनलाई तालिवानको रुहानी नेताको रुपमा लिने गर्दछन् ।
