विराटनगर, कार्तिक १८
सेवानिवृत्त कर्मचारीहरुले राज्यले आफूहरुको क्षमता र उर्जाको उपयोग गर्नसक्ने बताएका छन् । सेवानिवृत्त कर्मचारी समाज केन्द्रीय तदर्थ समिति मोरङले आज विराटनगरमा आयोजना गरेको दोस्रो साधारण सभामा पूर्व कर्मचारीहरुले यस्तो बताएका हुन् ।
समाजका अध्यक्ष परशुराम नेपालले सेवानिवृत्त कर्मचारीहरु उर्जाशील भएर अगाडि बढ्नु पर्नेमा जोड दिए । उनले राज्यलाई आवश्यक परेमा आफूहरु सहयोग गर्न तयार रहेको बताए ।
सेवानिवृत्त कर्मचारीहरु प्रशासनिक, आर्थिक , सामाजिक सम्पूर्ण रुपमा कुशल र क्षमतावान रहेको भन्दै उनले राज्यले सेवाका लागि आव्हान गरे आफूहरु सहयोग गर्न तयार रहेको बताए ।
कार्यक्रममा बोल्दै विराटनगर महानगरपालिकाका प्रमुख भीम पराजुलीले सेवानिवृत्तहरुको ज्ञानलाई उपयोग गरेर आफू अगाडि बढ्न तयार रहेको बताए ।
उनले अहिलेको अवस्थामा सेवानिवृत्तहरुलाई राज्यले उपयोग गर्न सके सरकारलाई आर्थिक रुपमा कम व्ययभार पर्ने तथा कर्मचारी समायोजनको समस्या कम हुने बताए ।
