विराटनगर : आफुले नागरिकताका लागि सिफारिस गरेका व्यक्ति गैरनागरिक भएको खुलेपछि विराटनगर– महानगरपालिका वडा नं १ का अध्यक्ष उद्धव अर्याल कानुनी झमेलामा परेका छन् ।
छिटो छरितो सेवा दिने नाममा राम्रो नबुझिकन हतारिएर सिफारिस गर्दा वडाअध्यक्ष अर्यालसहित, वडा सदस्य रमेश शाह, सचिव पुष्पा तिम्सिना कानुनी फन्दामा परेका हुन् ।
वडा अध्यक्ष अर्यालले वडा नं १ शान्तिचोकका सत्यनाारायण पोद्धारका छोरा भनी नागरिकताका लागि सिफारिस गरेका ब्यक्ति गैरनागरिक भएको खुलेपछि उनीसहित टिमलाई झमेला लागेको हो ।
सामान्य ज्यालामजदुरी गरेर गुजारा गर्दै आईरहेका पोद्दारले आफ्ना छोरा भनी नागरिकताका लागि वडा कार्यालयबाट सिफारिस गरेका थिए ।
तर, सिफारिस गरिएका व्यक्ति पोद्दारको जैविक सन्तान नभई गैरनागरिक भएको खुलेपछि जिल्ला प्रशासन कार्यालय मोरङले कारबाही प्रक्रिया अघि बढाएको छ ।
पोद्दारकै छोराहरु हुन् भनेर वडा सदस्य शाहले सनाखत गरेका थिए भने वडाअध्यक्ष अर्यालले सिफारिस गरको थिए ।
छोरा बनाई कीर्ते नागरिकता दिलाउने सत्यनारायण पोद्दार र राजेश पोद्दारलाई प्रहरीले पक्राउ गरेको छ ।, यो समाचार आजको उद्घोष दैनिकमा छापिएको छ ।
