पोखरा, कात्तिक १८
पोखरामा जारी नमस्ते पोखरा प्रिमियर लिग ( पिपिएल) टि–२० क्रिकेट प्रतियोगिता अन्तर्गत शनिबार भएको खेलमा अम्पायरसँग विवाद गरेपछि बिराटनगर टाईटन्सका कप्तान सन्दिप लामिछानेलाई कारवाहीमा परेका छन् ।
लिग अन्तर्गतको अन्तिम खेलमा चितवन राइनोजसंगको खेलमा अम्पायरले दिएको निर्णयको अनादर गर्दा सन्दीपलाई म्याच रेफ्री सत्यजित सरकारले कारवाही रुवरुप डि–मेरिट अंक दिएका हुन् ।
दोश्रो इनिंगको चौथो ओभरको अन्तिम बलमा किशोर महतोको बललाई नोबल घोषणा गरेपछि सन्दिपले त्यसको बिरोधमा अन्फिल्ड अम्पायर संजय सिग्देलसंग विवाद गरेका थिए। विवाद पछि सन्दिपको विपक्षमा मैदानमा उपस्थित दर्शकहरुले सन्दिप घमण्डी भन्दै नाराबाजी गरेका थिए।
खेलमा सन्दीप जस्तै आरोपमा किशोर महतो, सन्नी पटेललाई पनि अम्पायरको निर्णयको अनादर गरेका आरोपमा म्याच रेफ्रीले स्पष्टिकरण लिनुका साथै चेतावनी समेत दिएका छन् । आरोप लागेका सम्पूर्ण खेलाडीहरुले म्याच रेफ्रीसंग आफ्नो गल्ति स्वीकार गरिसकेको कारण अन्य कारवाही गरिएको छैन।
अन्तर्राष्ट्रिय क्रिकेटमा सन् २०१६ बाट प्रयोगमा आएको डी–मेरिट अंक खेलाडीको अनुशासन कायम गर्न प्रयोग गरिने मापदण्ड हो। अन्तर्राष्ट्रिय क्रिकेटमा २४ महिनाको समयमा कुनै खेलाडीले ४ डी–मेरिट अंक बटुलेमा १ टेस्ट वा २ सिमित ओभर क्रिकेट खेलबाट निलम्बन गर्ने नियम छ।
पिपिएल क्रिकेटका क्रममा सन्दिप लामिछानेले पाएको डी–मेरिट अंक नेपालमा आयोजना हुने सबै घरेलु क्रिकेट प्रतियोगिताका लागि १२ महिनासम्म रहने जानकारी म्याच रेफी सत्यजित सरकारले दिए।