विराटनगर मंसिर ८
आन्तरिक तथा वाह्य पर्यटकलाई लक्षित गर्दै विराटनगरबाट शनिवारबाट व्यावसायीक रुपमा पर्वतीय उडान (माउन्टेन फ्लाईट) सुरु भएको छ ।
प्रदेश नं १ को अस्थायी राजधानी रहेको विराटनगरबाट निजी क्षेत्रको पहलमा पहिलो पल्ट व्यावसायिक रुपमा माउन्टेन फ्लाईट सुरु गरिएको हो ।
विराटनगरका पर्यटन व्यवसायीहरुको पहलमा शनिवारबाट शुरु गरिएको माउन्टेन फ्लाईटमा प्रदेश नं एकका मुख्यमन्त्री शेरधन राईसहित मन्त्रीहरु प्रदेश सरकारका प्रमुख सचिव,त्यसैगरी विभिन्न मन्त्रालयका सचिवहरु,पर्यटन व्यावसायीसहितको टोलीले प्रदेश १ मा रहेका सर्वोच्च शिखर सगरमाथा, ल्होत्से, कञ्चनजंघा र मकालु आदि हिमशिखरहरुको अवलोकन गरेका छन् ।
यति एयरलाइन्सको सि आरजे जेट स्ट्रिमको २३ सिटे विमानले माउन्टेन फ्लाईट गरेको हो । बिशेष त भारत र बंगलादेशसहित आन्तरिक पर्यटकलाई काठमाण्डौं भन्दा सस्तोमा विराटनगरबाट माउन्टेन फ्लाईटको साप्ताहिक उडान गरिने योजना रहेको छ ।
पर्यटन व्यवसायीहरु आवद्ध ‘विराट होलिडेज’ नामक संस्थाको पहलमा विराटनगर विमानस्थलबाट चार्टर विमानमार्फत हप्ताको एक दिन शनिबार माउन्टेन फ्लाईट गराईने छ । विराट होलिडेजका अध्यक्ष भविषकुमार श्रेष्ठका अनुसार साप्ताहिकरुपमा गरिने माउन्टेन फ्लाईटका लागि यति एयरलाइन्ससँगको साझेदारी गरिएको छ ।
यति एयरलाइन्सलाई कुल ५५ मिनेटको उडान अवधि रहेको माउन्टेन फ्लाईट लागि प्रतिउडान १ लाख ८० हजार दिने सहमति भएको छ । विराटनगर ट्राभल्स एसोसियसनका अध्यक्ष फडिन्द्र अधिकारीका अनुसार यात्रुले ९ हजार ९ सयमा माउन्टेन फ्लाईट भर्ने पाउनेछन । विराटनगरबाट सुरु भएको माउन्टेन फ्लाईट काठमाण्डौ भन्दा सस्तो हो ।
काडमाण्डौबाट माउन्टेन फ्लाईटका लागि प्रति यात्रु ११ हजार ६ सय ३५ रुपैया तिर्नुपर्ने हुन्छ ।
पर्यटक भित्राउन माउन्टेन फ्लाईट कोशेढुङाःमुख्यमन्त्री
विराटनगरबाट शुरु भएको माउन्टेन फ्लाईटको उडानमा सरिक भएपछि मुख्यमन्त्री शेरधन राईले प्रदेशको बिकासका लागि पर्यटन क्षेत्र महत्वपूर्ण रहेकाले माउन्टेन फ्लाईट सुरु हुनुले वाह्य र आन्तरिक पर्यटन भित्राउन कोशेढुङा सावित हुने बताए ।
उनले प्रदेश भित्र रहेका पर्यटन क्षेत्रको प्रर्वद्धन र बिकास गरी त्यसले प्रदेशलाई समृद्धिको यात्रामा अघि वढनपनि सहयोग पुग्ने जानकारी दिए । उनले प्रदेश सरकारले नीजि क्षेत्रको सहयोगमा यस प्रदेशको बिकास गर्न चाहेको भन्दै प्रदेश सरकारको विकासको योजनालाई साझा बनाएर अघि वढन आवश्यक रहेकोमा जोड समेत दिए ।
उनले माउन्टेन फ्लाईटको उडान अब कुनैपनि अबस्थामा नरोकिने र यसलाई नियमित गर्नका लागि प्रदेश सरकारले सम्बन्धित एयरलाईन्स कम्पनीसंगपनि कुरा गर्ने आवश्वसन समेत दिए ।
सो अवसरमा प्रदेश १ का पर्यटनमन्त्री जगदिश कुशियतले माउन्टेन फ्लाईटलाई निरन्तरता दिन प्रदेश सरकार जुनसुकै सहयोग गर्न तयार रहेको बताए ।
विराटनगर ट्राभल्स एशोसियशनका अध्यक्ष फडिन्द्र अधिकारीले विराटनगरबाट माउन्टेन फ्लाईटको उडानलाई व्यवसायिक रुपमा नियमित गर्न चुनैती रहेको बताए । उनले आन्तरिक पर्यटनको भरमा मात्र उडानलाई नियमित गर्न सम्भव नहुने भन्दै वाह्य पर्यटन आर्कषित गर्न प्रदेश सरकारको तर्फबाट आवश्यक नीतिका साथै यसको प्रचारप्रसारका लागि सहयोग आवश्यक रहेकोमा जोड दिए ।
यात्रुको चापलाई हेरेर साप्ताहिक रुपमा शनिबारमात्र गरिने माउन्टेन फ्लाईटलाई शुक्रबारपनि गर्ने योजना रहेको छ । विराटनगरबाट सुरु भएको माउन्टेन फ्लाईटमा पर्यटकले प्रदेश १ भित्र पर्ने आठ हजार मिटरमाथिका हिमश्रृंखलाको अवलोकन गर्न पाउनेछन् ।
प्रदेश १ मा रहेका सर्वोच्च शिखर सगरमाथा, ल्होत्से, कञ्चनजंघा र मकालु आदि हिमशिखरहरु सहजै अवलोकन गर्न सकिने छ । प्रदेश १ मा मात्रै अहिले १४ वटा विमानस्थल रहेका छन्।जसमध्ये लुक्काका लागि मात्रै सरकारले उडान अनुमति दिएमा विराटनगरदेखि दैनिक पाँचवटा फ्लाईट हुनसक्ने व्यवसायीहरुको अनुमान छ ।
