९ पुस, काठमाडौं । प्रतिनिधिसभाको समानुपातिकतर्फ दलहरुले पाएको मतगणना सकिएको एक हप्ता भइसक्यो तर, दलहरुले पाएको सिट संख्या निर्वाचन आयोगले सार्वजनिक गर्न सकेको छैन । यसले नयाँ सरकार गठन प्रक्रिया नै रोकिएको छ ।
किन समानुपातिकको सिट तोक्न तोक्न सकिएन भनेर निर्वाचन आयोगले औपचारिकरुपमा बालेको छैन ।
सरकार छाडेर प्रतिपक्षमा जानुपर्ने कांग्रेस र सरकारको नेतृत्व गर्ने तयारीमा रहेको एमाले राष्ट्रियसभा गठनसम्वन्धी अध्यादेशलाई लिएर दन्तबझान गरिरहेका छन् ।
जब सरकारले अध्यादेश राष्ट्रपतिकहाँ पठाएको दुई महिना बित्यो र दलहरुले आफ्नो पोजिसन लिए, तबमात्रै राष्ट्रपति विद्या भण्डारीले राजनीतिक तथा कानुनी परामर्श थालेकी छन् ।
योबीचमा शुक्रबार बालुवाटारमा प्रधानमन्त्री शेरबहादुर देउवाको पहलमा पाँच दलको बैठक पनि बस्यो तर, कुनै निकास निस्किएन । निस्कने आशा र अपेक्षा पनि थिएन, किनकि दलहरु आफ्नो अडानमा टसमस भएकै छैनन् ।
माओवादीको मध्यमार्गी लाइन
यसैवीच पहिलो र दोस्रो दलको अडानका बीचमा तेस्रो दल माओवादीले भने मध्यमार्गी बाटो रोजेको छ । सुरुमा राजनीतिक सहमति गरौं भनेको माओवादी केन्द्रले अब भने खुलेरै कांग्रेसविहीन राष्ट्रियसभा बनाउन नहुने मत सार्वजनिक गरेको छ ।
माओवादी अध्यक्ष प्रचण्डले वाम गठबन्धनका सहयात्री एमालेका अध्यक्ष केपी ओलीलाई फोन गरेरै प्रतिपक्षलाई पनि सम्हालेर लिएर जानुपर्ने जिम्मेवारी सम्झाएका मात्र छैनन्, राष्ट्रियसभा गठनमा आफ्नो फरक मत दर्ज गराएका छन् ।
एमालेले अध्यादेशमा प्रस्तावित एकलसंक्रमणीय मत प्रणाली अस्वीकार्य भएको अडान लिँदै आएको छ । ओलीले यसलाई कांग्रेसको सत्ता लम्ब्याउने खेलका रुपमा लिएका छन् ।
तर, प्रचण्डले कांंग्रेसविहीन राष्ट्रियसभा बनाउन नहुने आफ्नो धारणा ओलीलाई सुनाएका छन् ।
‘कांग्रेसका साथीहरुको समस्या के भन्ने वामपन्थीहरुले बुझिदिनुपर्ने देखेको छु मैले’, प्रचण्डले चितवनमा आयोजित एक कार्यक्रममा भने, ‘बहुमतीयमा गयो भने कांग्रेसको एउटा पनि नआउने भयो, राष्ट्रियसभामा एकजना पनि नआउनु वामपन्थीका लागि पनि धेरै खुसीको कुरा हुँदैन ।’
प्रचण्डले अघि थपे, ‘यो प्रणालीभित्र कमसेकम प्रतिपक्षका २/४ जना हुँदा बहस छलफलमा जो जीवन्तता आउँछ । त्यो उपाय खोजी गर्नेतिर ध्यान दिँदा राम्रो हुने हो कि भनेर मैले भर्खर ओलीजीलाई भनेको छु, सोचौं है सोचौं ।’
दुईतिहाई नजिक मत पाएको वाम गठबन्धन बढी नै जिम्मेवार हुनुपर्ने उनले बताए । ‘बढी नम्र हुनुपर्ने र प्रतिपक्षलाई पनि सम्हालेर लिएर जानुपर्ने जिम्मेवारी हाम्रो छ’ सहमतिबाटै निकास खोज्नुपर्ने भन्दै उनले भनेका छन् ।
onlinekhabar
