खोटाङ, पुस १९
खोटाङको हलेसीबजारमा गएराती भएको आगलागीमा सात घर जलेर नष्ट भएका छन् । आगलागीमा परी हलेसी तुवाचुङ नगरपालिका–७ महादेवस्थानका व्यवसायी मगम राई, उचितबहादुर राई, तम्बराज राई र अम्बराज राईको घर पूर्णरुपमा जलेर नष्ट भएको छ ।
यस्तै, आगोका कारण प्रकाशचन्द्र गिरी, रेगिन्द्र राई, गोपिन राईल गायतको घरमा समेत क्षति पुगेको नगर प्रमुख इवन राईले बताए । साँझ करिब साढे ७ बजेदेखि सुरु भएको आगलागि करिब ११ बजे नियन्त्रणमा लिइएको थियो । आगो इलाका प्रहरी कार्यालय, हलेसीका प्रहरी र स्थानीयवासीले करिब साढे तीन घण्टापछि नियन्त्रणमा लिएका थिए ।
आगो नियन्त्रणका लागि सदरमुकाम दिक्तेलबाट पठाइएको दमकल र सुरक्षाकर्मी नपुग्दै नियन्त्रणमा आएको स्थानीयवासीेले बताए ।
आगलागीबाट भएको क्षतिको विस्तृत विवरण भने आउन बाँकी रहेको प्रहरीले जनाएको छ । मगम राईकोे घरबाट अचानक सुरु भएको आगलागीको कारण अहिलेसम्म खुल्न नसकेको प्रहरीको भनाई छ ।
