राजविराज, चैत्र १९
चित्रकार रञ्जु यादवको पहिलो एकल मिथिला चित्रकला प्रदर्शनी काठमाडौंको बबरमहलस्थित नेपाल आर्ट काउन्सिलमा जारी छ । व्यावसायिक रुपमा मिथिला चित्रकलामा ६ वर्षदेखि सक्रिय यादवले पछिल्लो तीन वर्षमा कोरेका चित्रहरु एकल प्रदर्शनीमा राखिएको छन् ।
नेपाली समाजमा भएका परिवर्तनलाई मात्र नभई समाज निरन्तर परिवर्तन र गतिशील हुनुपर्ने आफ्नो चाहनाअनुसार आफ्ना चित्रहरु कोरेकोले प्रदर्शनीको नाम ‘कलर्स अफ चेन्ज’ राखिएको उनले बताइन्। सर्वसाधारणदेखि पूर्व प्रधानमन्त्रीहरुसम्मले प्रदर्शनीको अवलोकन गरेका छन् ।
प्रदर्शनीमा हालसम्म नेपालका पूर्व प्रधानमन्त्रीद्वय माधवकुमार नेपाल, डा. बाबुराम भट्टराई, राष्ट्रिय जनता पार्टी नेपालका वरिष्ठ नेता महन्थ ठाकुर, उद्योगमन्त्री मातृकाप्रसाद यादव, पूर्वमन्त्री जितेन्द्रनारायण देव लगायतले अवलोकन गरेका छन् ।
प्रर्दशनी अवलोकन गर्न नागरिक समाजका अगुवा, पत्रकार, साहित्यकार, समाजसेवी, अधिकारकर्मी महिला, राजनीतिक दलका नेता, युवा, मैथिलीकर्मी लगायतले प्रदर्शनी अवलोकन गर्दै मुक्तकण्ठले प्रशंसा गरेका छन् ।
प्रदर्शित कलाचित्रहरुमध्ये केही चित्रहरु नेपालको तराईमधेस र मिथिला क्षेत्रको संस्कृति, परम्परा र जीवनशैली भल्काउने खालका छन् भने अधिकांश चित्रहरु समाजमा व्याप्त विकृति, विसंगति र समस्यालाई उजागर गर्दै त्यसको विरोधमा कोरिएका छन्।
