संखुवासभा, माघ ३
संखुवासभाको खाँदबारी नगरपालिका –४ भ्याङ खोला–तम्बे सडक खण्डको निर्माण कार्य एक वर्षको अवधीमा १२ प्रतिशत मात्र काम सम्पन्न भएको छ ।
करीब १२ करोड ६७ लाख २७ हजारको लगानीमा १५ किलोमिटर ग्राभेल गर्नुपर्नेमा हाल १२ प्रतिशत मात्र काम सम्पन्न भएको हो ।
उन्नति परियोजनाको लगानीमा निर्माण थालिएको भ्याङ खोला–याफुडाँडा–तम्बे सडक खण्डको निर्माण कार्य सुस्त गतिमाा भएको भन्दै स्थानीय आक्रोशित बनेका छन् ।
निर्माण कार्य सन्तोषजनक नभएको भन्दै केही दिन अघि सडकको अनुगमनमा उन्नति परियोजनाका वरिष्ठ पूर्वाधार विज्ञ सम्भु यादव, कार्यान्वयन संस्था जिल्ला प्राविधिक कार्यालय संखुवासभाका प्रमुख इन्जिनियर रमेशकुमार श्रेष्ठ सहितको टोली अनुगमनका लागि सडक खण्डमा पुगेको थियो ।
चैत पहिलो हप्ता निर्माण कार्य सम्पन्न गर्नुपर्ने भएपनि अहिलेसम्म १२ प्रतिशत मात्र काम सम्पन्न भएको प्रमुख इन्जिनियर श्रेष्ठको भनाइ छ । १५ महिनामा काम सम्पन्न गर्नुपर्नेमा प्रगति भने न्यून रहेको प्रमुख इन्जिनियर श्रेष्ठले बताए । समयका काम सम्पन्न गराउन जनशक्ति तथा उपकरण थप्नुपर्ने उनको भनाइ छ ।
निर्माण व्यवसायी सन्तोषकुमार राईले समयमा पर्याप्त इन्धन नपाएकोले काममा ढिलाइ भएको बताए । त्यस्तै, प्रतिनिधि र प्रदेशसभाको निर्वाचनको कारणले पनि निर्माण कार्यले गति लिन नसकेको राईको दावी छ ।
