किशोर विश्वकर्मा
विराटनगर, माघ ६
यसवर्ष ‘हिसान इस्लिङटन स्पोर्टस् मिट २०७४’ आगामि माघ ८ गते सोमबार देखी सुरु हुनेभएको छ । उच्च शिक्षालय तथा विद्यालय संघ(हिसान) मोरङको आयोजनामा प्रत्येक वर्ष सञ्चालन हुदै आएको उक्त खेल महोत्सव यसवर्ष सरस्वती पुजाका दिन देखी सुरु हुन लागेको विराटनगरमा आज आयोजित पत्रकार सम्मेलनमा जानकारी दिइएको हो ।
पत्रकार सम्मेलनमा उच्च शिक्षालय तथा विद्यालय संघ(हिसान) मोरङका अध्यक्ष बलराम पन्तले यसवर्षको ‘हिसान इस्लिङटन स्पोर्टस् मिट २०७४’ मा २१ विद्यालयका करीब १ हजार ३ सय ८४ विद्यार्थीले भाग लिने जानकारी दिए । उनले विगतका वर्षहरुमा झैँ यसवर्ष पनि फुटबल, क्रिकेट, भलिवललगायतका सम्पूर्ण खेलहरु समावेश गरिने र यसवर्षदेखी बास्केटबलसमेत थप गरिएको जानकारी दिए ।
‘हिसान इस्लिङटन स्पोर्टस् मिट २०७४’ को उद्घाटन खेलसहित फुटबलका सवै इभेन्टस्हरु शहिद रंगशालामा हुनेछन । त्यस्तै क्रिकेट तथा अन्यखेलहरु वैजनाथपुर रंगशालामा गरिनुका साथै यसवर्ष देखी थप गरिएको बास्केटवल प्रतियोगिता भने मेरिल्याण्ड कलेज विराटनगरमा आयोजना गरिने आयोजकले जनाएको छ ।
सो खेल महोत्सव सम्पन्न गर्न करीक ७ लाख रुपैयाँ लाग्ने अनुमान गरिएको र उक्त लागत रकम ५० प्रतिशत प्रायोजकबाट तथा ५० प्रतिशत प्रवेश शुल्कबाट संकलन गरिने हिसान मोरङका अध्यक्ष पन्तले पत्रकार सम्मेलनमा जानकारी दिए ।
खेल महोत्सवलाइ इस्लिङटन कलेज काठमाडौँले मुख्य प्रायोजन गरेको छ भने सह–प्रायोजकमा इस्लिङटन कलेजकै सहकार्यमा सञ्चालीत मेरील्याण्ड कलेज, इटहरी इन्टनेशनल कलेज र हेराल्ड कलेज रहेका छन् । खेल महोत्सव आगामि माघ १६ गते शहिद दिवसका दिन सम्पन्न हुनेछ ।
