काठमाडौँ, जेठ ३
गृहमन्त्री रामबहादुर थापा (बादल) ले स्व. मदन भण्डारी र जीवराज आश्रितको हत्यारा खोजी प्रक्रिया शुरू गरिएको दाबी गरेका छन्। २६औं मदन–आश्रित स्मृति दिवसको अवसरमा मदन भण्डारी स्मृति बाटिका, कोटेश्वरमा आयोजित कार्यक्रममा बोल्दै गृहमन्त्री थापाले छानबिन प्रक्रिया शुरू गरिएकाले छिट्टै हत्यारा पत्ता लाग्ने समेत बताए ।
गृहमन्त्री थापाले भण्डारीको शालिक अगाडि उभिएर भने, ‘मदन भण्डारी र जीवराज आश्रितको हत्याबारे छानबिन गर्न हामीले प्रक्रिया थालेका छौं, छिट्टै हत्यारा पत्ता लाग्ने छ।’
नेकपा एमालेका तत्कालीन महासचिव भण्डारी र संगठन विभाग प्रमुख आश्रितको २०५० जेठ ०३ गते चितवनको दासढुंगामा जीप दुर्घटनामा परी निधन भएको थियो। जुन दुर्घटनालाई नेकपाले रहस्मय भन्दै आएको छ।
स्व. नेता भण्डारीकी श्रीमती विद्या भण्डारी राष्ट्रपति र उनका पार्टी नेताहरुले अहिले सरकार सञ्चालन गरिरहेका छन्। तर, २६ वर्षअघिको रहस्मय भनिएको उक्त जीप दुर्घटनाको तथ्य अहिलेसम्म बाहिर आउन सकेको छैन।
दुर्घटनाका साक्षी जीप चालक अमर लामाको हत्या गरीएपछि त्यो घटना झन् रहस्मय बनेको हो। घटनाको दिन पोखराबाट मुग्लिनसम्म सँगै आएका नेपाल कम्युनिष्ट पार्टीका अध्यक्ष ऋषि कट्टेलले पनि मदन भण्डारीको रहस्यमय हत्या गरिएको दाबी गर्दै आएका छन्।
