१२ मंसिर, काठमाडौं ।
दक्षिण एसियाली खेलकुद (साग) अन्तर्गतकोे महिला भलिबलमा नेपाल भारतसँग पराजित भएको छ । बिहीबार त्रिपुरेश्वरस्थित कभर्ड हलमा भएको आफ्नो दोस्रो खेलमा खेलमा नेपाल बलियो टोली भारतसँग ३–० को सोझो सेटमा पराजित भएको हो ।
हालै मात्र सेन्ट्रल जोन भलिबलको उपाधि जितेको नेपालका लागि परीक्षाका रुपमा हेरिएको भारतसँग पहिलो खेलमा नेपालले उत्कृष्ट प्रदर्शन पनि गरेको थियो । तर २४–२२ को अवस्थामा पुगिसकेको नेपालले जित निकाल्न सकेन । नेपाललाई त्यही अवस्थामा रोक्दै भारतले पहिलो सेटमा २६–२४ को जित निकाल्यो ।
त्यसपछिका दुई सेटमा भारत हाबी भयो । भारतले दोस्रो सेट २५-१२ र तेस्रो सेट २५–१६ ले दुबै जित्यो । नेपालले पहिलो खेलमा बंगलादेशलाई ३–० ले हराएको थियो । नेपाल र भारत दुबैको समान ३र३ अंक छ भने बंगलादेशको शुन्य । अब समूह चरणको अन्तिम खेलमा भारतले बंगलादेशलाई हराए उपविजेताका रुपमा नेपाल सेमिफाइनलमा पुग्नेछ ।
