१३ माघ, काठमाडौँ ।
त्रिभुवन आर्मी क्लबलाई पछि पार्दै मछिन्द्र क्लब सहिद स्मारक ‘ए’ डिभिजन लिग फुटबलमा अंक तालिकको शीर्ष स्थानमा उक्लिएको छ । सोमबार दशरथ रंगशालामा भएको खेलमा मछिन्द्रले थ्री स्टार क्लबलाई २—० गोल अन्तरले पराजित गर्दै शीर्ष स्थानमा उक्लिएको हो ।
मछिन्द्रका लागि रेजिन सुब्बाले ३८ औं मिनेट र विशाल राई ‘बी’ ले खेलको ९० औं मिनेटमा गोल गरे । जितसँगै मछिन्द्र क्लबले १९ अंक जोड्दै शीर्ष स्थानमा पकड जमाएको हो । दोस्रो स्थानमा रहेको आर्मी क्लबको १७ अंक छ । उसले एक खेल कम खेलेको छ । सोमबार पराजयपछि थ्रीस्टार क्बल ९ खेलबाट १४ अंक सहित चौथो स्थानमा छ ।
आजै भएको अर्को खेलमा नेपाल पुलिस क्लबले सशस्त्र प्रहरीको एपीएफ टिमलाई पराजित गरेको छ । पुलिसलाई १—० को जित दिलाउने क्रममा कप्तान भोला नाथ सिलवालले गोल गरे । उनले पेनाल्टी मार्फत गोल गरेका हुन् । जितसँगै पुलिले ९ खेलबाट १४ अंक जोड्दै अंक तालिकामा ५ औं स्थान कायम गरेको छ । पराजित एपीएफ भने रेलिगेसनको जोखिममा परेको छ । ९ खेलबाट उसको ५ अंक मात्रै छ । अंक तालिकामा एपीएफ पुछारबाट दोस्रो स्थानमा रहेको छ ।
