२६ माघ, विराटनगर ।
विराटनगर–१२ मलङ्वास्थित उखुबारीमा मृत अवस्थामा फेला परेकी दुहबी नगरपालिका–६ की सम्झना खत्री परियारको हत्या गरेको आरोपमा प्रहरीले एक जनालाई पक्राउ गरेको छ । ३२ वर्षीया सम्झनाको हत्याको आरोपमा सप्तरीको कृष्णश्रवण गाउँपालिका–३ मट्टीगढा घर भई मोरङको बुढिगंगा गाउँपालिका – ३ पोठियामा डेरा गरी बस्ने क्वालिटी नुडल्स फ्याक्ट्रीका स्टोर ईन्चार्ज २५ वर्षीय सुरेन्द्रप्रसाद साहलाई मोरङ प्रहरीले पक्राउ गरी आइतबार सार्वजनिक गरेको हो ।
सम्झनाको शव शुक्रबार बिहान शंकास्पद् अवस्थामा विराटनगर १२ स्थित उखुबारीमा फेला परेको थियो । घटनाबारे स्थानीयले जानकारी गराएसँगै तत्काल प्रहरी उपरीक्षकको कमाण्डमा खटिएको प्रहरी टोलीले अनुसन्धान सुरु गरेको थियो । बिबाहित सम्झनासँग प्रेममा रहेका सुरेन्द्रले मंगलबार बिहानैदेखि फोन सम्पर्क गर्दा नभएपछि खोजेर बेलुका बाँसबारी चोक अगाडी भेट्टाएको र दिनभर कहाँ गएको भनेर सुरेन्द्रले सोध्दा नभनेपछि त्यही क्रममा वादविवाद हुँदा हत्या भएको खुलेको जिल्ला प्रहरी कार्यालय मोरङका एसपी विश्व अधिकारीले पत्रकार सम्मेलनमा जानकारी दिए ।
सम्झनाको शव उखुबारीमा पश्चिम टाउको, पूर्व खुट्टा उतानो परेको अवस्थामा कुर्ता सुरुवाल लगाएको, घाँटी काटिएको तथा घाँटीमा सलले बेरिएको अवस्थामा फेला परेको थियो । कसको शव भनेर सनाखत गर्ने क्रममा दुहवी – ६ कालीमन्दिर चोक बस्ने बसन्त परियारकी श्रीमती सम्झना रहेको र सम्झनाको सुरेन्द्रसँग विगत ३ बर्ष देखि प्रेम सम्बन्ध रहँदै आएको खुलेको उपरीक्षक अधिकारीले बताए । सम्झना र सुरेन्द्र केही समय अघिसम्म क्वालिटी नुडल्स फ्याक्ट्रीमा सँगै काम गरेको पनि उनले बताए । प्रहरीका अनुसार मंगलबार बिहान १० बजेदेखि सम्झना सुरेन्द्रको सम्पर्कमा थिइनन् । १२ बजे सम्झनाको घरमा जाँदा घरमा ताल्चा लागेको देखे पश्चात् उनी फ्याक्ट्रीमा काम गरेर ४ बजे खोज्न निस्केका थिए । सम्झनालाई बाँसबारी चोक अगाडि भेटेपश्चात चोकबाट पश्चिम नहरको बाटो हुँदै दक्षिणतर्फ जाने क्रममा विराटनगर – १२ मलङ्वास्थित रिङरोड छेउमा मोटरसाईकल रोकी गफगाफ गर्ने क्रममा वादविवाद तथा झै– झगडा हुँदा रिसको आवेगमा आई प्रेमी सुरेन्द्रले सम्झनाकै सलले घाँटीमा बेरी तान्दै उखुबारीमा र्पुयाई धारिलो बाँसले घाँटी रेटेर मारेको खुलेको अधिकारीको भनाई छ ।
प्रहरीले सुरेन्द्रलाई पक्राउ गर्नुका साथै घट्नास्थल सम्म सम्झनालाई बोकेर लगेको मोटरसाईकल, दुई थान मोबाईल बरामद् गरेको छ । सम्झनाको मोबाईल भने हालसम्म पत्ता लाग्न सकेको छैन । सम्झनाका २ छोरी छन् । सम्झनाका श्रीमान बसन्त इलाममा कपडा सिलाउने काम गर्दैआएका थिए । बुधबार घर आएका उनले श्रीमतीलाई घरमा नभेटेपछि इलाका प्रहरी कार्यालय निमुवामा खोजी गरिदिन आग्रह गरेका थिए । श्रीमान बसन्त समेतको जाहेरीमा सुरेन्द्रमाथि कर्तब्य ज्यान सम्बन्धी मुद्दामा थप अनुसन्धान भई रहेको प्रहरीले जनाएको छ ।
