२ चैत, काठमाडौं । गर्मी सुरू भएसँगै डेंगी रोग फैलिएको भन्दै सरकारले सतर्क रहन आग्रह गरेको छ । इपिडिमीयोलोजी तथा रोग नियन्त्रण महाशाखाका अनुसार गत दुई महिनामा देशभर ३६ जनामा डेंगी देखिएका छन् ।
प्रदेश नम्बर १ मा ६ जना, बागमती प्रदेशमा ९ जना, गण्डकी प्रदेशमा ५ जना, प्रदेश नम्बर ५ मा १४ जना र सुदुरपश्चिम प्रदेशमा २ जनामा डेंगी देखिएको हो । महाशाखाले डेंगीबाट बच्न सरसफाइमा ध्यान दिनुपर्ने बताएको छ ।
पानी जमेको खाल्डाखुल्डी पुर्ने र झुलको प्रयोग गर्न आग्रह गरिएको छ । टेकु सरुवा रोग अस्तपतालका चिकित्सक शेरबहादुर पुन डेंगी अरू भाइरसजस्तो खतरा नभएकोले यसबाट आत्तिहाल्नु पर्ने अवस्था भने नरहेको बताउँछन् । आर्थिक वर्ष २०७५÷०७६ मा तीन हजार चार सय जनामा डेंगी संक्रमण देखिएको थियो ।
