३० चैत, काठमाडौँ ।
पुराना नराम्रा कुराहरुलाई त्यागेर नयाँ जोश र जाँगरकासाथ नेपाली नयाँ वर्ष मनाइँदै आईएको छ । यसपटक पनि नयाँ वर्ष २०७७ नेपालीको घरआँगनमा आईसके पनि विश्व नै कोरोनाको संकटमा गुज्रिरहेको बेला नयाँ विगतको जस्तो खास भने नहुने भएको छ । नेपालमा पनि कोरोना संक्रमण फैलन नदिन सरकारले लकडाउन गरेको छ भने डाक्टर, नर्स, सुरक्षाकर्मी लगायत यसविरूद्धको मोर्चामा खटिएका छन् ।
हर्षोल्लासका साथ मनाउन नसकेपनि कोरोना संक्रमण हुन नदिन र दैनिक जीवन सहज बनाउन अग्रमोर्चामा खटिएकाहरूको हौसला बढाउन नयाँ वर्षमा राष्ट्रिय गान गाएर ऐक्यबद्धता जनाउन प्रधानमन्त्री केपी शर्मा ओलीले आग्रह गरेका छन् । आईतबार ट्वीट् मार्फत प्रधानमन्त्रीले यूएन ग्लोबल कम्प्याक्ट नेपाल आव्हान गरेको सो कार्यक्रममा सबैलाई सामेत हुन आग्रह गरेका हुन् । नयाँ वर्ष २०७७ अर्थात वैशाख १ गते बिहान ८ बजे आ–आफ्नो घरको कौसी, झ्याल वा छतमा उभिएर राष्ट्रिय गान गाएर ऐक्यबद्धता जनाउन ग्लोबल कम्प्याक्ट नेपालले गरेको अपिललाई समर्थन गर्दै प्रधानमन्त्रीले समर्थन गरेका हुन् ।
ग्लोबल कम्प्याक्ट नेपाल राष्ट्रिय गान गाउन, बजाउन र अन्तमा एकैसाथ ताली पिट्न भनेको छ । यो अभियान देशभरि एकैसाथ लागु गर्न कम्प्याक्ट नेपालले आह्वान गरेको छ । सो समय एफएमहरूबाट समेत राष्ट्रिय गान प्रसारण हुने जनाइएको छ ।
