१० असार, काठमाडौं ।
नागरिकता ऐन, २०६३ लाई संशोधन गर्न बनेको विधेयकको विरोधमा जनता समाजवादी पार्टी (जसपा)ले देशभर विरोध प्रदर्शन गर्ने भएको छ ।जसपाका अध्यक्षद्वय महन्थ ठाकुर र उपेन्द्र यादवद्धारा बुधबार जारी विज्ञप्तिमा असार १६ गते जिल्ला सदरमुकाम र मुख्य सहरहरूमा विरोध प्रदर्शन र सभा आयोजना गर्न लागिएको जनाईएको छ ।
राज्य व्यवस्था तथा सुशासन समितिबाट पारित भएर प्रतिनिधिसभामा पुगेको नागरिकता विधेयकका कतिपय प्रावधान विभेदकारी भएको जसपाको ठहर छ ।जनता समाजवादी पार्टीले नेपाली नागरिकसँग विवाह गरेका विदेशी नागरिकले आफ्नो मुलुकको नागरिकता त्यागेको प्रमाणको आधारमा अंगीकृत नागरिकता दिनुपर्ने माग गरेको छ ।
नेपाली नागरिकसँग वैवाहिक सम्बन्ध कायम गरेकी विदेशी महिला अंगीकृत नागरिकता पाउन कम्तीमा निरन्तर सात वर्षसम्म नेपालमा बस्नुपर्ने प्रावधानमा उनीहरुले विरोध जनाएका छन् ।
विज्ञप्तिमा भनिएको छ, ‘संविधानको मूल्य मान्यता र मर्म तथा प्राकृतिक न्यायको सिद्धान्त विपरीत रहेकव् संशोधन प्रस्तावले महिला अधिकारको हनन हुनुका साथै नेपाल पक्ष राष्ट्र रहेको सबै प्रकारका भेदभाव उन्मुलुनसम्बन्धी अन्तर्राष्ट्रिय महासन्धिको पनि विरुद्धमा रहेका छन् ।’