२३ असार, एजेन्सी । टोटनह्याम हट्सपरले इंग्लिस प्रिमियर लिगमा महत्त्वपुर्ण जित हात पारेको छ । टोटनह्यामले एभर्टनमाथि १–० को आत्मघाती गोलको सहयोगमा झिनो जित निकालेको हो ।
टोटेनह्यामकै मैदानमा सोमबार राति भएको खेलमा पहिलो हाफमा माइकल किनले गरेको आत्मघाती गोल नै टोटेनह्यामको जितमा पर्याप्त बन्यो । उनले खेलको २४औं मिनेटमा आत्मघाती गोल गर्न पुगेका थिए ।
प्रतिस्पर्धात्मक बनेको खेलमा ह्यारी केनको प्रहारलाई क्लोज रेन्जबाट मासन होल्गेटले बचाएपनि जियोभानी लो सेल्सोको प्रहार माइकल किनलाई डिफ्लेक्ट हुँदै गोलमा परिणत भएको थियो ।
खेलमा मौका पाए पनि थप गोल निस्कन नसक्दा टोटेनह्याम १–० ले विजयी हुन सफल भयो ।
जितसँगै टोटेनह्याम ३३ खेलबाट ४८ अंक जोडेर आठौं स्थानमा उक्लिएको छ । पराजित एभर्टन ४४ अंक जोडेर ११ औं स्थानमा यथावत छ ।
