६ साउन, एजेन्सी ।
विश्व फुटबलकै प्रतिष्ठित बालोन डी’ओर अवार्ड यसवर्ष स्थगित गरिएको छ । सन् १९५६ यता फ्रान्स फुटबलले प्रदान गर्दै आएको अवार्ड कोरोनाका कारण पहिलोपटक वितरण नहुने भएको हो ।
यसवर्ष प्रदान गरिने अवार्ड स्थगित गर्ने निर्णय गरिएको फ्रान्स फुटबल म्यागेजिनले जनाएको छ । कोरोनाले फुटबल गतिविधिलाई असर गरेकाले सहि मूल्याङ्कन गर्न नसकिने फ्रान्स फुटबलले जनाएको छ ।
म्यागेजिनले प्रत्येक वर्ष उत्कृष्ट एकजना फुटबल खेलाडीलाई यो अवार्ड प्रदान गर्दै आइरहेको थियो ।गत वर्षको अवार्ड स्पेनिस क्लब बार्सिलोनाका अर्जेन्टाइन सुपरस्टार लिओनल मेसीले जितेका थिए ।
मेसी सर्वाधिक ६ पटक यो अवार्ड जित्ने खेलाडी हुन् । इटालियन क्लब युभेन्ट्सका स्ट्राइकर क्रिस्टियानो रोनाल्डोले पाँच पटक अवार्ड जितेका छन् । फ्रान्स फुटबलले २०२१ देखि अवार्डलाई निरन्तरता दिने बताएको छ ।
