१९५ नम्बर सीमास्तम्भ नजिक तारबार गर्न खोज्दा एसएसबीले अवरोध पुर्याएको वडाध्यक्ष नारायण जैशीले जानकारी दिए । सो क्षेत्रमा पूर्वसहमति अनुसार विद्युतीय तारवार लगाउन खाेजे पनि बिहीबार एसएसबीले पुनः अवरोध गरेको अध्यक्ष जैशीले बताए ।
‘विवाद नहोस् भनेर पूर्वसहमति नै गरी दशगजा क्षेत्रबाट करिव ५-७ मिटर वरैबाट तारबार गर्न खोज्दासमेत एसएसबीले अवरोध गर्यो,’ जैशीले भने ।
हतियारधारी एसएसबीले स्थानीयबासीले गाडेका पोलहरु उखेलेर फालेको छ भने तारहरुलाई काटिदिएको छ ।
पुनर्वासको सीमावर्ती क्षेत्रमा सीमा विवाद रहेको भन्दै एसएसबीले विभिन्न ठाउँमा पटकपटक अवरोध गर्दै आएको छ । भारतीय एसएसबीको गतिविधिबाट स्थानीय आजित बनेका छन् ।
गत वर्ष पनि पुनर्वासको आनन्द बजारमा एसएसबीले स्थानियलार्इ अवरोध गर्दा तनाव बढेको थियो । विवादको क्रममा एसएसबीले गोली चलाउँदै स्थानीय गोविन्द गौतमको मृत्यु भएको थियो ।यो घटना भएको एक वर्ष पूरा हुँदासम्म पनि नेपाल-भारत सीमा विवाद समाधान हुन नसक्दा नेपालीहरुले पटक-पटक एसएसबीको ज्यादती सहनुपरेको स्थानीय बताउँछन् ।
