नितेश यादव
१० भदौ, जनकपुरधाम ।
जनकपुरमा पिकअपले मोटरसाइकललाई ठक्कर दिँदा एक युवकको मृत्यु भएको छ भने अर्को एक जना गम्भिर घाइते भएका छन् । धनुषाको मिथिलाबिहारी नगरपालिका ४ बस्ने मोटरसाइकल चालक २२ वर्षीय कलाम नदाफको मृत्यु भएको वडा प्रहरी कार्यालय मुजेलियाले जानकारी दिएको छ ।
बुधबार दिउँसो जनकपुरधाम उपमहानगरपालिका १३ पिडारीचोकदेखि कुर्था जाने बाटोमा ज १ च १८०१ नम्बरको पिकअपले विपरित दिशातर्फबाट गईरहेको प्रदेश २-०३-००१ प २२७५ नम्बरको मोटसाइकललाई ठक्कर दिँदा मोटरसाइकल चालकको मृत्यु भएको छ भने मोटरसाइकललाई ठक्कर दिने पिकअपका चालक भने फरार भएका छन् । उनको खोजी भइरहेको धनुषा प्रहरीले जनाएको छ ।
पिकअपले विपरित दिशा तर्फबाट आइरहेको मोटसाइकललाई ठक्कर दिँदा चालक नदाफ सडकबाट करिब ५ फिट तल झरेका थिए । घाइते नदाफलाई उपचारका लागि प्रादेशिक अस्पताल लग्दै गर्दा बाटोमै मृत्यु भएको जिल्ला प्रहरी कार्यालयका प्रवक्ता डीएसपी मकेन्द्रकुमार मिश्रले जानकारी दिए ।
दुर्घटनामा परि मोटरसाइकलको पछाडि बसेका जनकपुरधाम उपमहानगरपालिका ५ का २८ वर्षीय अजाबुल मन्सुर राईनको दाहिने खुट्टा भाँचिएको छ । घाइते मन्सुरलाई उपचारका लागि प्रादेशिक अस्पतालमा पठाइएको प्रहरीले जनाएको छ ।
