नितेश यादव
१६ भदौ, जनकपुरधाम ।
सिराहामा कोरोना भाइरसको संक्रमणका कारण एक निजामती कर्मचारीको मृत्यु भएको छ । यससँगै सिराहामा कोरोनाबाट मृतकको संख्या ८ पुगेको छ। सिराहाको मिर्चैया नगरपालिका–६ मटिअर्वाका ५५ वर्षीय ती कर्मचारीको सोमबार राति संक्रमणबाट मृत्यु भएको हो ।
मधुमेहका विरामी रहेका उनको सुगर लेभेल बढेपछि थप उपचारका लागि धरानस्थित बीपी कोइराला स्वास्थ्य विज्ञान प्रतिष्ठान लगिएकोमा उपचारका क्रममा मृत्यु भएको जिल्ला स्वास्थ्य कार्यालय सिरहाका प्रमुख कृष्णदेव यादवले जानकारी दिए । अस्पताल भर्ना गर्नुअघि भदौ ८ गते विराट नर्सिङहोममा पीसीआर परीक्षणका लागि लिइएको स्वाब परीक्षणको भदौ १० गते आएको रिपोर्टमा उनलाई कोरोना पोजेटिभ देखिएको यादवले बताए ।
रिपोर्ट पोजेटिभ आएपछि भदौ १० गते उनलाई थप उपचारका लागि बीपी कोईराला स्वास्थ्य विज्ञान प्रतिष्ठान धरान रिफर गरिएको थियो । मधुमेह, उच्च रक्तचाप, नेमोनिया, मृगौला लगायतका समस्या रहेका उनको उपचारको क्रममा उनको सोमबार राती प्रतिष्ठानको आइसोलेसनमा मृत्यु भएको यादवको भनाइ छ ।
मृतक मिर्चैया नगरपालिकाको कृषि तथा पशु शाखामा कार्यरत निजामती कर्मचारी हुन् । उनको शव ल्याउने तयारी भइरहेको मिर्चैया नगरपालिकाले जनाएको छ । शव मिर्चैयामै नेपाली सेनाले व्यवस्थापन गर्नेछ ।
