१० असोज, एजेन्सी ।
पाकिस्तानका प्रधानमन्त्री इमरान खानले जम्मू र कश्मीरको विवाद अन्तर्राष्ट्रिय वैधताका आधारमा समाधान नभएसम्म दक्षिण एशियामा शान्ति र स्थायित्व नहुने दाबी गरेका छन् ।
संयुक्त राष्ट्रसंघको महासभामा सम्बोधन गर्दै प्रधानमन्त्री खानले जम्मू र कश्मीरको विवाद सुल्झाउनुपर्ने भन्दै राष्ट्रसङ्घको सुरक्षा परिषद्ले यो डरलाग्दो विवाद रोक्नुपर्ने तथा इस्ट टिमोरमा जसरी नै आफ्नो प्रस्ताव कार्यान्वयन गर्नुपर्ने बताएका हुन् ।
खानले जम्मू–कश्मीरमा भारतीय संविधानको धारा ३७० खारेज गर्ने निर्णयको आलोचना गर्दै फासीवादी, अधिनायकवादी, आरएसएसको नेतृत्व भएको भारतीय सरकार यदि पाकिस्तानसँग आक्रामक हुने प्रयास गरेमा पाकिस्तानले आफ्नो स्वतन्त्रताका लागि अन्तिम समयसम्म लड्ने चेतावनी दिएको बीबीसीले जनाएको छ ।
प्रधानमन्त्री खानले जम्मू–कश्मीर र आतंकवाद विषय उठाएपछि संयुक्त राष्ट्रसंघको महासभामा भारत र पाकिस्तानबीच फेरि जम्मू–कश्मीर र आतंकवादको विषयमा विवाद भएको छ ।
खानको भनाइपछि भारतले कडा प्रतिवाद गरेको छ । संयुक्त राष्ट्रसंघको भारतका स्थायी प्रतिनिधि टीएस तिरुमूर्तिले पाकिस्तानी प्रधानमन्त्रीको टिप्पणीलाई राजनीतिक पतनको संज्ञा दिएका बीबीसीले जनाएको छ ।
तिरुमूर्तिले खानको भनाइ मिथ्या र व्यक्तिगत आक्रमण भएको भन्दै पाकिस्तानले अल्पसङ्ख्यकहरुको उत्पीडन तथा सीमापार आतंकवाद लुकाउने प्रयासमा त्यसो भनेको दाबी पनि गरेका छन् ।
