बिराटनगर,बैशाख २४ ः हिन्दु धर्मगुरु श्रीनिवास आचार्यमाथि भएको गोलि प्रहार उनको आफ्नै योजना अनुसार भएको खुलेको छ ।
देशमा हिन्दु धर्म कायम गर्ने वातावरण बनाउन श्रीनिवासाचार्य आफैँले आफूलाई गोली हान्न योजना बनाएको कुरा प्रहरी अनुसन्धानबाट खुलेको हो ।
गत चैत २५ गते राति मोरङको बिराटनगरमा भएको गोली प्रहारको घटना अनुसन्धानका क्रममा प्रहरीले श्रीनिवासाचार्यलाई काठमाडौँको विमानस्थल आसपासको क्षेत्रबाट पक्राउ गरेको हो ।
उनकै योजना अनुसार गोलि हान्ने र पेस्तोल उपलब्ध गराउने दुई युवालाई जिल्ला प्रहरी कार्यालय मोरङले पक्राउ गरी सोमबार सार्वजनिक गरेको छ ।
सुनसरीको बराह नगरपालिका–६ स्थित चक्रघट्टीमा आश्रममा बस्ने २४ वर्र्षीय श्रीनिवासाचार्य मोरङको विराटनगर महानगरपालिका–१४ स्थित जतुवामा रहेको श्री रामजानकी मन्दिरमा पुराणमा आएका उनको गत चैत २५ गते बिहानको राति १ बजेर ४५ मिनेटमा गोली प्रहार भएको थियो ।
उनलाई गोलि हान्ने भरतपुर महानगरपालिका–४ बेलचोक बस्ने २९ वर्षीय माधव चौधरी रहेका छन् । यो कुरा चौधरीले मोरङ प्रहरीसँगको बयान र सोमबार भएको पत्रकार सम्मेलनमा पनि स्विकारेका छन् ।
त्यसैगरी गोली हान्न प्रयोग गरिएको पेस्तोल भने श्रीनिवासाचार्यका विश्वासपात्र नवलपरासीको गैँडाकोट–५ बस्ने ३२ वर्षीय खान र सन्तोष भनिने लक्ष्मीराज अधिकारीले उपलब्ध गराएको पनि खुलेको छ ।
‘मैले नै घरमा राखिएको गोलीसहितको पेस्तोल गुरु श्रीनिवासाचार्यले भनेपछि पठाएको हुँ’, चौधरीले प्रहरीसँगको बयान र पत्रकार सम्मेलनमा भनेका छन ।
केही उपाय गर्दा पनि देशलाई हिन्दुराज्य बनाउन नसकिएपछि यस्तो विधि अपनाउनुपरेको बयान गुरु श्रीनिवासाचार्यले प्रहरीलाई दिएको मोरङ प्रहरी प्रमुख एसपी अरुणकुमार विसीले बताए ।
प्रहरीले अधिकारी र चौधरीलाई वैशाख २० गतेबाट लागू हुने गरी मोरङ जिल्ला अदालतबाट ज्यान मार्ने मुद्दा चलाउन सात दिनको म्याद थपिसकेको छ ।
‘हिन्दुराज्य कायम गर्नका लागि विभिन्न चरणमा भएका आन्दोलनले सार्थक रुप नलिएपछि जनता र धर्मगुरुहरुलाई उक्साउनका लागि गुरु श्रीनिवासचार्यले आफ्ना विश्वासपात्र लक्ष्मीराज अधिकारीलाई हतियारको व्यवस्थापन गर्न लगाई गोली समेत हान्ने माधव चौधरीलाई खोजी प्रशिक्षण दिएर घटना गराएको पाइयो’, मोरङ प्रहरी प्रमुख एसपी बिसीले पत्रकार सम्मेलनमा भने ।
