काठमाडौँ : सत्तारूढ दल नेपाल कम्युनिस्ट पार्टीभित्र करिब टरिसकेको आन्तरिक विवाद फेरि उत्कर्षमा पुगेको छ । प्रधानमन्त्री एवं पार्टी अध्यक्ष केपी शर्मा ओलीले पार्टीले गरेको निर्णय कार्यान्वयन नगरेको भन्दै विवाद चुलिएको हो । अध्यक्षद्वय केपी शर्मा ओली र पुष्पकमल दाहाल ‘प्रचण्ड’बीच भएको सहमतिअनुरुप प्रधानमन्त्री ओलीले पार्टीले गरेको निर्णय कार्यान्वयन नगरेपछि प्रचण्ड रुष्ट रहँदै आउनुभएको छ ।
पार्टीभित्रको आन्तरिक विवाद समाधान गर्न गठित कार्यदलले सरकार सञ्चालनको क्रममा महत्वपूर्ण निर्णय गर्दा प्रधानमन्त्री ओलीले पार्टीको समन्वय गर्नुपर्ने समझदारी भएको थियो । तर महत्वपूर्ण निर्णय गर्दा प्रधानमन्त्री ओलीले पार्टीका कार्यकारी अध्यक्ष प्रचण्डसँग कुनै सहमति कायम नगरी निर्णय लिएपछि नेकपाभित्रको विवाद थप चुलिएको छ ।
पछिल्लो पटकको मन्त्रिपरिषद् पुनर्गठन, राजदूत सिफारिस, अन्य नियुक्ति तथा कर्णाली प्रदेशका मुख्यमन्त्री महेन्द्रबहादुर शाहीविरुद्ध अविश्वास प्रस्ताव, भारतीय खुफिया एजेन्सी ‘रअ’का प्रमुख सामन्तकुमार गोयलसँगको भेट, पर्सा घटनालगायतका विषयमा प्रचण्ड ओलीसँग चर्को असन्तुष्टि राख्दै आउनुभएको थियो ।
दुई अध्यक्षबीचको विवाद उत्कर्षमा पुगेसँगै कर्णाली प्रदेशको विवाद समाधान गर्न समेत फरक–फरक परिपत्र भएको थियो । पार्टीभित्रको विवादलाई लिएर संवादसमेत हुन नसकेको अवस्थामा शनिबार अध्यक्षद्वय ओली–प्रचण्डबीच भेटवार्ता भएको छ । प्रधानमन्त्री एवं अध्यक्ष ओलीले भेटका लागि बारम्बारको प्रस्तावपछि प्रचण्ड शनिबार बालुवाटार जानुभएको हो ।
भेटमा प्रचण्डले सचिवालय बैठक बोलाउने प्रस्ताव गरेका प्रचण्डका प्रेस संयोजक विष्णु सापकोटाले बताउनुभयो । प्रचण्डले भारतीय खुफिया एजेन्सी ‘रअ’का प्रमुख सामन्तकुमार गोयलको नेपाल भ्रमण, कर्णाली प्रदेशको विवाद, पर्सा घटनालगायतका विषयमा सचिवालयमा छलफल गर्न प्रस्ताव गर्नुभएको बताइएको छ । दुई अध्यक्षबीच छलफल भए पनि सचिवालय बैठकको मिति तय गर्न भने सहमति जुटेको छैन ।, यो समाचार आजको नेपाल समाचारपत्रमा छ ।
