१९ कात्तिक, दमक ।
दमकमा दुईसहित झापामा बुधबार कोरोना संक्रमण भएका तीन जनाको मृत्यु भएको छ । कोरोना पोजेटिभ भएर होम आईसाेलेसनमा रहेकी दमक-५ की २२ वर्षीया युवती कोठामा पंङ्खामा झुण्डिएको अवस्थामा मृत भेटिएको प्रहरीले जनाएको छ । युवती मृत भेटिएपछि नेपालीको सेनाको टोली आएर उक्त शव उठाएको थियो । नेपाल प्रहरीको टोली विहानैदेखि घरलाई सिल गरेर सेनालाई पर्खेर बसेको थियाे।
यसैगरी दमक-३ का ६५ बर्षिय पुरुषको पनि कोरोना संक्रमणका कारण मृत्यु भएको स्वास्थ्य कार्यालय झापाले जनाएको छ । उपचारको क्रममा विराटनगरस्थित नावेल अस्पतालमा उनको मृत्यु भएको हो । यो संगै दमकमा कोरोना संक्रमणबाट मृत्यु हुनेको संख्या २१ पुगेको छ ।
यसैगरी बुधबार नै झापाको मेचीनगर नगरपालिकामा पनि एकजनाको कोरोना संक्रमणबाट ज्यान गएको छ । मेचीनगर -१४ की एक महिलाको ज्यान गएको हो । स्वास्थ्य कार्यालय झापाले बुधबार साँझ सार्वजनिक गरेको कोभिड विवरण अनुसार जिल्लामा कोरोना संक्रमण भएर मृत्यु हुनेको संख्या ५६ पुगेको छ ।
