८ पुष, काठमाडौं । पछिल्लो राजनीतिक घटनाक्रम प्रति निजी क्षेत्रका संघ–संगठनहरुले चिन्ता व्यक्त गर्दै संयमतापूर्वक निर्णय लिन आग्रह गरेका छन् ।
नेपाल उद्योग वाणिज्य महासंघ, नेपाल चेम्वर अफ कमर्स र नेपाल उद्योग परिसंघले बुधबार संयुक्त विज्ञप्ति जारी गर्दै पछिल्ला घटनाक्रमले मुलुकको अर्थतन्त्रलाई फाइदा नपुग्ने बताएका छन् । प्रमुख राजनीतिक दलहरूलाई संयमतापूर्वक निर्णय लिन आग्रह गरेका छन् । विज्ञप्तीमा भनिएको छ, ‘राजनीतिक स्थिरताबाट मात्र नीतिगत स्थिरता आउने, नयाँ नयाँ उद्योग, व्यवसाय फस्टाउने, रोजगारी सृजना हुने, नयाँ लगानी आकर्षण हुने र समग्रमा अर्थतन्त्रले गतिलिन सक्ने यथार्थतालाई कसैले पनि भुल्न हुंदैन’ । यस्तै लेखिएको छ ‘विश्वव्याधी कोभिड १९ का कारण यसै त मुलुक आक्रान्त भई अर्थतन्त्रमा गम्भीर असर परिरहेका बेला पछिल्लो समय उब्जिएको राजनीतिक समस्याबाट उत्पन्न हुन सक्ने अस्थिरताको परिणाम थप गम्भीर हुनेतर्फ निजी क्षेत्र चिन्तित छ ।’
