२० फागुन, विराटनगर । विराटनगरका पत्रकार हरिहर नेपाल झापामा पुरस्कृत भएका छन्। जंगवीर गुभाजु श्रेष्ठ प्रतिष्ठान झापाले पत्रकार नेपाल सहित दुईजनालाई पुरस्कृत गरेको हो ।
झापाको बुट्टाबारीमा मंगलबार आयोजित कार्यक्रममा मकालु टेलिभिजनका सहायक सम्पादकसमेत रहेका हरिहर नेपाललाई प्रतिष्ठानले नेपाललाई ११ हजार १ सय ११ रुपैयाँ नगद राशिसहितको पत्रकारिता पुरस्कार समर्पण गरेको हो ।
डेढ दशकदेखि पत्रकारितामा सक्रिय नेपाललाई प्राज्ञ विवश पोखरेल, प्रदेश १ का सांसद बृखबहादुर प्रधान, कृष्णभूषण बल स्मृति प्रतिष्ठानकी प्रमुख संरक्षक शोभा लामा बल, वरिष्ठ कलाकार माया पौडेल आशावादी, प्रतिष्ठानका अध्यक्ष बाबुराम श्रेष्ठ ‘वर्षा’ लगायतले दोसल्ला ओढाएर सम्मानपत्र र नगद प्रदान गरे ।
पत्रकार नेपाल विगत डेढ दशकदेखि स्काई, एफएम, उज्यालो एफएम, नेपाल वान टेलिभिजन, नेपाल समाचारपत्र हुदै अहिले मकालु टेलिभिजनमा आवद्ध रहेका छन् ।
त्यसैगरी सोही अवसरमा इटहरीकी साहित्यकार रीता ताम्राकारलाई पनि प्रतिष्ठानले साहित्यिक पुरस्कार प्रदान गरेको छ । ताम्राकारलाई पनि नगद ११ हजार १ सय ११ रुपैयाँ र सम्मानपत्र प्रदान गरिएको थियो ।
प्रतिष्ठानले हरेक वर्ष पत्रकारिता र साहित्य क्षेत्रमा योगदान पु¥याउने व्यक्तिलाई सम्मान र पुरस्कार समर्पण गर्दै आएको छ । कार्यक्रममा ज्येष्ठ नागरिक र समाजसेवीलाई पनि सम्मान गरिएको थियो ।
