त्रिपोली, जेठ ३०
लिबियाको जेलमा रहेका भनिएका पत्रकारको रिहाइका लागि यहाँ रहेको संयुक्त राष्ट्रसंघीय मिसनले माग गरेको छ ।
लिबियाको जेलमा राखिएका दुई जना पत्रकारलाई तुरुन्त रिहा गर्न उक्त कार्यालयले माग गरेको हो । ती दुई जना पत्रकारलाई बिना पक्राउ पूर्जी थुनामा राखिएकोमा विरोध पनि भई आएको थियो ।
उनीहरुको रिहाइका लागि संयुक्त राष्ट्रसंघीय मिसनले पुनःमाग गरेको समाचरमा जनाइएको छ ।
दुई जना पत्रकारलाई लिबिया सरकारले अप्रिलको अन्तिम हप्तादेखि थुनामा राखेको छ । तर उनीहरुलाई के कति कारणले पक्राउ गरिएको हो भन्ने बारेमा मौखिकरुपमा बताएको भएपनि पक्राउ पूर्जी दिइएको छैन ।
बिना पक्राउ पूर्जी र कारण पत्रकारलाई सरकारले नै यसरी लामो समयसम्म थुनामा राख्दा प्रेस स्वतन्त्रता तथा नागरिकको विचार तथा अभिव्यक्ति अधिकार हनन् भएको भन्दै उनीहरुको रिहाइको माग गरेको हो ।
लिबियामा शान्ति स्थापनाको कार्यमा रहेको राष्ट्रसंघीय मिसन, युएनएसएमआइएलले ती पत्रकारको रिहाइको माग गरेको समाचारमा जनाइएको छ ।
रासस
