८ चैत, काठमाडौँ । भारत बायोटेकको उत्पादन कोभ्याक्सिन खोपले नेपालमा आपत्कालीन प्रयोगका लागि अनुमति पाएको छ । औषधि व्यवस्था विभागले शुक्रबार उक्त खोप प्रयोगको अनुमति दिएको हो ।
भारत बायोटेकले कोभ्याक्सिन खोपको प्रभावकारिता ८१ प्रतिशत रहेको दाबी गर्दै आएको छ । तेस्रो चरणको क्लिनिकल ट्रायलको नतिजा सार्वजनिक गर्दै उक्त कम्पनीले त्यस्तो दाबी गरेको हो । कोभ्याक्सिन २ देखि ८ डिग्री सेल्सियस तापक्रममा सुरक्षित र सहजै भण्डारण गर्न सकिन्छ ।
भारतमा कोरोनाविरुद्धको खोपको प्रयोग गर्ने अनमुति पाउने दुई कम्पनीमध्ये एक बायोटेक पनि हो । भारत सरकारले हालसम्म कोभिसिल्ड र कोभ्याक्सिन खोपलाई मात्र आपत्कालीन प्रयोगको अनुमति दिएको छ ।
कोभिसिल्ड अक्सफोर्ड विश्वविद्यालय र एस्ट्राजेनेकाले तथा कोभ्याक्सिन भारतकै भारत बायोटेक र औषधि अनुसन्धान परिषद्को साझेदारीमा विकास गरिएको हो ।
कोभिसिल्डको उत्पादक सिरम इन्स्टिच्युट अफ इन्डिया र कोभ्याक्सिन हैदराबादको भारत बायोटेकले नै उत्पादन गरिरहेको छ ।
विश्वकै सबैभन्दा ठूलो खोप उत्पादक सेरमसँग मासिक १० करोड र बायोटेकसँग करिब मासिक ३ करोड खोप उत्पादन गर्न सक्ने क्ष्मता छ ।
नेपालमा यसअघि कोभिसिल्ड र चिनियाँ कम्पनीले विकास गरेको कोरोनाविरुद्धको खोप ‘भेरो सेल’ लाई नेपालमा आपत्कालीन प्रयोगको अनुमति दिइएको छ ।
