२३ चैत्र, विराटनगर ।
राष्ट्रिय फुटबल टोलीका क्याप्टेन तथा गोलकिपर किरण चेम्जोङ एसियाकै उत्कृष्ट खेलाडी घोषित भएका छन् ।
आफ्नो कप्तानीमा नेपाली राष्ट्रिय टोलीलाई पहिलो उपाधि दिलाएका किरण चेम्जोङ साताको उत्कृष्ट एसियाली खेलाडी चुनिएका हुन् ।
एसियाली फुटबल महासंघ (एएफसी)को अनलाइन मत सर्वेक्षण ‘एएफसी इन्टरनेसनल प्लेअर अफ दी विक’मा चेम्जोङ उत्कृष्ट खेलाडी घोषित भएका हुन् ।
एएफसीले मत सर्वेक्षणका लागि आफ्नो वेबसाइटमा १० जना खेलाडीको नाम राखेको थियो । त्यसमध्ये ५५.६९ प्रतिशत मत प्राप्त गर्दै चेम्जोङ उत्कृष्ट खेलाडी घोषणा गरिएका हुन् ।
यसमा साउदी अरेबियाका सलेह अल–सेहेरीले दोस्रो स्थानमा छन् । उनले २०.७२ प्रतिशत मत पाएका छन् । त्यस्तै, इराकका अल अली हवई तेस्रो भएका छन् ।
उनले १०.१६ प्रतिशत मत पाएका छन् । एएफसी इन्टरनेसनल प्लेअर अफ दी विक बनेका किरणको कप्तानीमा गत साता नेपालले बंगलादेशलाई २–१ ले हराउँदै थ्री नेसन्स कपको उपाधि जितेको थियो ।
थ्री नेसन्सकप कपमा ३ खेलमा २ क्लिन सिट राखेका किरणले फाइनलमा १ गोलको सामना गरेका थिए । नेपाले दशरथ रंगशालामा ३७ वर्षपछि फुटबल उपाधि जितेको थियो ।
सन् १९८४ मा तत्कालिन दक्षिण एसियाली महासंघिय खेलकुद (साफ) हालको सागमा स्वर्ण पदक जितेको थियो । त्यसयता राष्ट्रिय टोलीले दशरथ रंगशालमा जितेको यो पहिलो उपाधि हो ।
१९९९ मा आठौं सागको फाइनल पुगेपनि नेपाली टोली उपाधि जित्न असफल भएको थियो । आई लिग टोली राउन्ड ग्लास पञ्जाबबाट व्यवसायिक फुटबल खेल्दै आएका किरण थ्री नेसन्स कपका लागि एक खेल अघि नै स्वदेश फर्केका थिए ।
पञ्जाब चौथो स्थानमा रहेपनि किरण आई लिगकै उत्कृष्ट खेलाडी चुनिएका थिए । एएफसीले बिहीबार एएएफसी इन्टरनेसनल प्लेअर अफ दी विकमा किरणसहित १० खेलाडीको मनोनयन सार्वजनिक गरेको थियो ।
त्यसमा ९ खेलाडीलाई पछि पार्दै किरण विजेता बनेका हुन् । यसरी मनोनयनमा पर्ने किरण नेपालकै पहिलो खेलाडी थिए भने उपाधि जित्ने पनि पहिलो खेलाडी बनेका छन् ।
किरणले एसियाकै साताको उत्कृष्ट खेलाडीको अवार्ड जित्नु खुसीको विषय भएको जनाएका छन् । ‘यो वर्ष मेरो लागि भाग्यमानी सावित भएको छ । म एकदमै गौरवान्वित छु ।
नेपालको इतिहासमै यो पहिलो पटक मनोनयनमा परेको र जितेको हो । यो हाम्रो लागि उपलब्धि हो र गर्वको क्षणसमेत हो,’ उनले सामाजिक सञ्जालमा लेखेका छन्,’ ।
