२३ चैत, काठमाडौं । प्रधानमन्त्री केपी शर्मा ओलीले अविश्वासको प्रस्ताव फिर्ता लिए राजीनामा दिन्छु भन्नु र माओवादी लगायत काग्रेसले नयाँ सरकार गठनको तयारी सुरु गर्नुले अबको नयाँ प्रधानमन्त्रीका विषयमा चर्चा हुन थालेको छ ।
नयाँ सरकारमा जाने विषयमा निर्णय गरि नसकेको जसपालाई फकाउन नेपाली कांग्रेस र नेकपा माओवादी केन्द्रले छलफललाई तिब्रता दिएसँगै जसपा फकिए, ओली सरकार ढल्ने निश्चित छ । त्यस्तोमा तीन दलको संयुक्त सरकार बन्नेछ र नयाँ प्रधानमन्त्रीका लागि खिचातानी सुरु हुनेछ । माओवादी केन्द्रले स्पष्ट रुपमा प्रधानमन्त्रीको दाबीदारी नरहने बताइसकेको छ । कांग्रेसले आफ्नै नेतृत्वमा सरकारमा जान पहल गर्ने बताएकाले अबको प्रधानमन्त्रीमा कांग्रेसबाट सभापति शेरबहादुर देउवाको सम्भावना अधिक छ । तर निर्णायक जसपाले प्रधानमन्त्रीमा बार्गेनिङ गरिरहेको चर्चा चलेको छ । जसपा ओली सरकार बचाउन वा ढाल्न वा संयुक्त सरकार गठन गर्न निर्णायक हो । निलम्बित बाहेक प्रतिनिधिसभाका ३२ सांसद रहेको जसपाले सरकार गठनका विषयमा निर्णय गरिसकेको छैन । त्यसैले जसपा तानातानमा परिरहेको छ । जसपा भित्र महन्थ ठाकुर र राजेन्द्र महतो पक्ष ओली सरकारलाई नै समर्थन गर्ने पक्षमा देखिँदा उपेन्द्र यादव र बाबुराम भट्टराई ओलीको विकल्प खोज्नै पर्ने र ओली सरकारलाई समर्थन गर्न नसकिने बताइरहेका छन् ।
प्रधानमन्त्री ओलीले ठाकुर र महतोलाई प्रभावमा पारिरहेका छन् भने यादव र भट्टराई ओली इतरका दल र नेताको पक्षमा छन् । ओली तर्फ ढल्केका ठाकुर र महतोसँग कांग्रेस र माओवादीले घनिभूत छलफल गरिरहेको छ । आइतबार जसपा अध्यक्ष ठाकुरसँग कांग्रेसका वरिष्ठ नेता रामचन्द्र पौडेलले भेट गरि सरकारमा सहकार्य गर्ने विषयमा छलफल गरे । आफ्नै नेतृत्वमा सरकारमा जाने निर्णय गरेको कांग्रेससँग ठाकुरले चित्त दुखाएकाले जसपालाई सरकारको नेतृत्व गर्न दिए जसपा सरकारमा सहभागि हुने देखिन्छ । तर पार्टी भित्र र बाहिरको चर्को दबाबपछि मात्र ओली सरकारको विकल्प खोजेर नयाँ सरकार गठनका लागि तयार भएका देउवा जसपालाई सरकारको नेतृत्व दिन तयार होलान् त भन्ने प्रश्न यथावत छ यद्यपी जसपा अध्यक्ष ठाकुरसँगको भेटमा कांग्रेस नेता पौडेलले सरकारको नेतृत्व गर्ने विषयमा छलफल गर्न सकिने बताएका छन् । त्यसरी सरकारको नेतृत्व गर्ने विषयमा कांग्रेस लचिलो भएर जसपाले सरकारको नेतृत्व गर्ने अवसर पाए जसपा भित्र पनि प्रधानमन्त्रीका आकांक्षी दुई जना महन्थ ठाकुर र बाबुराम भट्टराई देखिएका छन् ।
माओवादी केन्द्रले सरकारको नेतृत्व नचाहेकाले सरकारमा सहकार्य गर्ने सम्भावना रहेका अन्य दल कांग्रेस र जसपाबाट प्रधानमन्त्रीका तीन जना आकांक्षी देखिएका छन् । यसअघि पनि पटक पटक प्रधानमन्त्री भइसकेका शेरबहादुर देउवा, यस्तै एकपटक प्रधानमन्त्री भएका जसपा नेता बाबुराम भट्टराई र अर्का नेता महन्थ ठाकुर नयाँ सरकार गठनका लागि प्रधानमन्त्री बन्ने सम्भावना बोकेका नेता हुन् । तीन दल मध्ये ठूलो दल कांग्रेस भएकाले जसपाको नेतृत्वको सरकारमा कांग्रेस कसरी सहभागि हुन्छ भन्ने विषय प्राथमिक छ तर जसपा नभइ सरकार गठन हुनै नसक्ने भएकाले ओलीलाई हटाउँदै नयाँ सरकार गठन गर्न जसपाको नेतृत्व स्विकार्नुको विकल्प कांग्रेससँग छैन । यता जसपामा समेत, बलियो यादव र भट्टराई खेमा कुनै हालतमा ओली सरकारको विकल्प खोजिरहेकाले कांग्रेस कै नेतृत्वमा भएपनि सरकारमा सहभागि हुने वा आफ्नै पार्टी फुटाउने विकल्प जसपासँग छ । यसरी हेर्दा अहिलेको सरकार बनाउने खेलमा प्रधानमन्त्रीकै लागि जसपा फेरि दुई चिरामा विभक्त नहोला भन्न सकिन्न ।
