२८ चैत, कर्णाली । कर्णाली प्रदेशका तीन मन्त्रीको राजीनामा स्वीकृति भएको छ ।
शनिबार मुख्यमन्त्री महेन्द्रबहादुर शाहीले आर्थिक मामिला तथा योजना मन्त्री प्रकाश ज्वाला, सामाजिक विकास मन्त्री दल रावल र उद्योग, पर्यटन, वन तथा वातावरण मन्त्री नन्दसिंह बुढाको राजीनामा स्वीकृत गरेका हुन् ।
सर्वोच्च अदालतले एमाले र माओवादी केन्द्रको गठबन्धनलाई खारेज गरेर पूर्ववत् अवस्थामा फर्काएपछि एमालेबाट मन्त्री बनेका उनीहरुलाई पार्टीले फिर्ता बोलाएसँगै गएको मंगलबार राजीनामा दिएका थिए । योसँगै माओवादी केन्द्रबाट मुख्यमन्त्री बनेका शाही नेतृत्वको प्रदेश सरकार अल्पमतमा छ ।
यस्तै, मुख्यमन्त्री शाहीले रिक्त रहेको स्थानमा हाल कायम रहेकै मन्त्रीहरुलाई थप जिम्मेवारी दिएका छन् । आर्थिक मामिला तथा योजना र उद्योग, पर्यटन, वन तथा वातावरण मन्त्रीको जिम्मेवारी आन्तरिक मामिला तथा कानुन मन्त्री नरेश भण्डारी तथा भौतिक पूर्वाधार विकास मन्त्री र सामाजिक विकास मन्त्रीको जिम्मेवारी भूमि व्यवस्था, कृषि तथा सहकारी मन्त्री विमला केसीलाई दिइएको छ ।
