७ वैशाख, सुनसरी । धरान उप–महानगरपालिकाको सामुदायिक तथा निजी विद्यालयहरुमा मंगलबार पनि भौतिक उपस्थितिमै पढाइ भएको छ ।
सोमबार बसेको मन्त्रिपरिषदको बैठकले अति प्रभावित शहरी क्षेत्र उपत्यकाका, धरान लगायतको विद्यालयहरु वैशाख मसान्तसम्म बन्द गर्ने निर्णय गरेको थियो ।
धरानमा विद्यालय बन्द गर्नुपर्ने अवस्था नभएकोले विद्यालयहरु बन्द नभएको संस्थागत विद्यालयहरुको संगठन प्याब्सन तथा एन प्याब्सनको संयुक्त समिति एरिया कोअर्डिनेसन कमिटि (एसिसि)का अध्यक्ष राजेन्द्र गुरुङले बताए ।
उनले भने, ‘यहाँ विद्यालय नै बन्द गर्नुपर्ने अवस्था नभएकोले विदा दिएका छैनौं । आज मेयरसँग छलफल छ । त्यसपछि के निर्णय हुन्छ ।’
धरान उप–महानगरपालिकाका शिक्षा महाशाखा प्रमुख रत्न कटुवालले भने आधिकारिक सूचना नपाएको कारण विद्यालय खुलेको बताए ।
उनले भने ‘मन्त्रिपरिषदले निर्णय गरेको भन्ने कुरा समाचारमा थाह पायौं । आधिकारिक सुचना नआएकोले विद्यालय खुलेका छन् । आज सर्वदलीय बैठक बस्दैछौं । सम्भवतः भोलिदेखि वैकिल्पक माध्याममा जान्छौं ।’
