५ जेठ, काठमाडौं ।
सरकारले कोरोनाको विषयलाई लिएर थप सचेत हुन नागरिकलाई आग्रह गरेको छ । गएको वर्ष भन्दा यसवर्ष कोरोना सङ्क्रमणको असर धेरै देखिएको र अत्यधिक सङक्रामक नयाँ भेरिएन्ट पनि पुष्टि भएको अवस्थामा निषेधाज्ञाको पूर्ण पालना गर्न गृह मन्त्रालयले अनुरोध गरेको छ ।
कोरोना सङ्क्रमण नियन्त्रणका लागि विभिन्न जिल्लामा गरिएको निषेधाज्ञाको कार्यान्वयन अहिलेसम्म सन्तोषजनक देखिएको गृह मन्त्रालयले निकालेको विज्ञप्तिमा उल्लेख छ ।
गृह मन्त्रालयका प्रवक्ता जनकराज दाहालले आदेशको प्रभावकारी कार्यान्वयन र असहज परिस्थितिलाई सहज तथा सामान्य बनाउन अझै अत्यावश्यक रहेकाले थप सचेत हुन आग्रह गरे ।
अहिलेसम्म चार जिल्लामा आंशिकसहित देशका ७४ जिल्लामा निषेधाज्ञा लागू भएको छ । मनाङ, खोटाङ र तेह्रथुममा निषेधाज्ञा छैन । अत्यावश्यक सेवा प्रवाहका लागि आवश्यकतानुसार गाडी सञ्चालन गरिएको र आवश्यक अक्सिजन आपूर्ति सकेसम्म सहज बनाइएको प्रवक्ता दाहालले निकालेको विज्ञप्तिमा उल्लेख छ ।
मन्त्रालयका अनुसार निषेधाज्ञा अवज्ञा गरी मास्क नलगाई हिँड्ने २१ हजार ९ सय ४२ जनालाई जरिवाना गरिएको छ । त्यस्तै सचेतनामूलक कार्यक्रममार्फत चार लाख ३७ हजार बढीलाई मास्क वितरण गरिएको छ ।
