२४ असार, काठमाडौं ।
इजरायलले दिएको ५८ थान भेन्टिलेटरसहित २० करोड रुपैयाँ बराबरको स्वास्थ्य सामग्री नेपाल आइपुगेको छ । नेपाल वायु सेवा निगमको जहाजले आज बिहीवार बिहान स्वास्थ्य सामग्री काठमाण्डौ ल्याएको हो ।
नेपालका लागि इजरायली राजदूत हनान गोडेरसहितको टोलीले त्रिभुवन अन्तर्राष्ट्रिय विमानस्थलमै पुगेर स्वास्थ्य सामग्री परराष्ट्र र स्वास्थ्य मन्त्रालका पदाधिकारीलाई हस्तान्तरण गरेको छ ।
इजरायल सरकार, इजरायलमा रहेका स्वास्थ्य संस्था, व्यावसायिक क्षेत्र, नेपाली दूतावास र इजरायलमा रहेका नेपालीहरूबाट सहयोग स्वरूप स्वास्थ्य सामग्री नेपाल आएको इजरायलका लागि नेपाली राजदूत अञ्जान शाक्यले बताए ।
५८ थान भेन्टिलेटर, एक सय २० थान अक्सिजन कन्सन्ट्रेटर, आइसीयूसँग सम्बन्धित उपकरण, औषधि, पीपीई, थर्मल गनलगायतका कोरोनाको उपचारसँग सम्बन्धित सामग्री नेपाल पठाइएको र थप सहयोग जारी राख्ने राजदूत शाक्यको भनाइ छ ।
कोरोनासँग सम्बन्धी इजरायलले अपनाएको उपचार पद्धतिका बारेमा नेपाललाई सहयोग गर्न नेपाल सरकारसँगको समन्वयमा ‘स्मार्ट कोभिड कमान्ड कन्ट्रोल रुम’ स्थापना गर्न सफ्टवेयर तथा आवश्यक उपकरणसमेत पठाएको राजदूत शाक्यले बताए ।
