विराटनगर,असार २२
विराटनगर विमानस्थललाई अन्तर्राष्ट्रियस्तरको बनाउन प्रदेश सरकारले पहल सुरु गरेपछि यहाँका पर्यटन ब्यवसायी उत्साहित भएका छन । प्रदेश–१ को मन्त्रिपरिषद् बैठकले नै विमानस्थललाई तत्काल अन्तर्राष्ट्रियस्तरको बनाउन संघीय सरकारलाई आग्रह गर्ने निर्णय गरिसकेको छ । लामो समयदेखि पूर्वका उद्योगी व्यवसायीहरूले यो विमानस्थलको स्तरोन्नति गरी अन्तर्राष्ट्रियस्तरको बनाउन माग गर्दै आएका थिए ।
पूर्वबजेट छलफल कार्यक्रममा मोरङ व्यापार संघ, उद्योग संगठन मोरङ, विराट व्यापार संघसहित पर्यटन व्यवसायीहरूले विमानस्थलको स्तरोन्नतिको माग गर्दैै आएका थिए । मन्त्रिपरिषद्को बैठकले अन्तर्राष्ट्रियस्तरको विमानस्थलका रूपमा विकास गर्न तत्काल काम अगाडि बढाउन संघीय सरकारलाई अनुरोध गर्ने निर्णय गरेको पर्यटन तथा उद्योगमन्त्री जगदीश कुसियतले जानकारी दिए । प्रदेश सरकारले हालको १ हजार ५ सयको रनवेबाट ३ हजार मिटरको धावनमार्गसहितको अन्तर्राष्ट्रियस्तरको बनाउन संघीय सरकारसमक्ष अनुरोध गर्ने निर्णय गरिएको उनको भनाइ छ ।
नागरिक उडड्न प्राधिकरणले पनि आन्तरिक रुपमा विमानस्थलको विकास र विस्तारको योजनालाई अघि बढाएको छ । विराटनगर विमानस्थलका प्रमुख टेकनाथ सिटौलाले अल्पकालीन मध्यकालीन र दीर्घकालीन गरी तीन चरणमा विमानस्थलको विकास र विस्तार गरिने जानकारी दिए । पहिलो अल्पकालीन योजनामा विमानस्थलको पूर्वपट्टी साढे ४ विगाह जमिन र त्यसमा रहेका २६ घरलाई अधिग्रहण गरिनेछ । जसको प्रक्रिया अन्तिम चरणमा पुगीसकेको छ । मध्यकालीन योजनामा क्रस बोर्डर जहाजको उडानका लागि ५ वर्षभित्र विमानस्थलरलाई तयार पारिने छ भने दीर्घकालीन योजनामा विमानस्थललाई फुल अन्तराष्टिय स्तरको बनाइनेछ । जहाँबाट यूरोप अमेरिकासम्म सिधा उडान हुनेछ ।
अल्पकालीन योजनालाई पूर्णता दिन जमिनको मुअब्जा तोकि वितरण सुरु गरीसकेको बताउदै उनले भने जग्गाको मुल्याङन सकी वितरण सुरु भईसक्यो अब घरको पनि मुअब्जा वितरण सुरु हुन्छ । विमानस्थलले घरको पनि मुल्याङन गरी स्थानीय घरधनीहरुलाई असार मसान्तसम्म रकम बुझीलिन सूचना जारी गरेको छ । प्रतिधुर ३ लाखदेखि ४ लाख २५ हजारसम्म जग्गाको मुअब्जा वितरण गरेको विमानस्थलले घरका लागि भने २० हजारदेखि १५ लाखसम्म मुअब्जा वितरणको तयारी गरेको सिटौलाले जानकारी दिए । विमानस्थलले मुअब्जा लिई आगामी कात्तिक मसान्तसम्म घर खाली गराउन पनि घरधनीहरुलाई अपिल गरेको छ ।
विराटनगर विमानस्थलका प्रमुख टेकनाथ सिटौलाका अनुसार यो विमानस्थल १ सय १० बिघा क्षेत्रफलमा अवस्थित छ । यहाँबाट हाल प्रतिदिन १ हजार ७ सय यात्रु ओहोरदोहोर गर्छन् । स्वदेशका १० वटा विमान कम्पनीका जहाजले दैनिक १५ वटासम्म उडान भरिरहेका छन् । स्तरोन्नति गरिएपछि यहाँबाट १ सय ५० सिट क्षमताका ठूला विमान उड्न सक्नेछन् । विराटनगरबाट तत्काल भारतको कोलकाता र नयाँ दिल्लीको उडान भर्न सकिने सम्भावना छ । साथै नयाँ दिल्ली हुँदै बंगलादेशको ढाकाको उडान पनि सञ्चालन गर्न सकिने पर्यटन व्यवसायी पुण्य भट्टराईको दाबी छ ।
यस विमानस्थलबाट हाल ७० सिट क्षमताका ८० आर ७२ र सिआरजे जेड ७ सय सिरिजका विमानले उडान भरिरहेका छन् । साथै साना टुइनअटर विमान पनि सञ्चालित छन् । अन्तर्राष्ट्रियस्तरको बनाइएमा न्यारो बडी जेट सर्भिसबाट संसारको कुनै कुनामा पनि हवाई सम्बन्ध कायम गर्न सकिने प्रमुख सिटौलाको भनाइ थियो । यहाँबाट २०५८ सालमा नेकोन एअरले कोलकाताको उडान सञ्चालनमा ल्याएको थियो । तर यो सेवा ६ महिनाभन्दा बढी चलेन । कालान्तरमा नेकोन पनि बन्द भयो ।
त्यसबेला यात्रु कम भएका कारण देखाएर सेवा स्थगित गरिएको थियो । प्रदेश सरकारले निर्णय नै गरेर अन्तर्राष्ट्रियस्तरको बनाउन केन्द्र सरकारलाई आग्रह गर्ने निर्णय गरेपछि पर्यटन व्यवसायी उत्साहित भएका छन् । “हामीले लामो समयदेखि विमानस्थललाई अन्तर्राष्ट्रियस्तरको बनाउन माग गर्दै आएका थियौं,” पर्यटन व्यवसायी भट्टराईले भने,“अब भने हाम्रा माग पूरा हुने संकेत देखिएको छ ।” उनले सम्पूर्ण आन्तरिक तथा माउन्टेन उडान पनि विराटनगरबाटै सञ्चालन गर्न माग गरेका छन । ”
