काठमाडौं: बुद्ध एयरका पाइलट आङ्गेलु शेर्पा र को–पाइलट अमन अन्सारीलाई नेपाल नागरिक उड्डयन प्राधिकरणले अझै दुई दिन उडान भर्न नदिने भएको छ ।
जहाज इन्सिडेन्ट (दुर्घटनाको नजिक पुगेर जोगिएको) को विषयमा बढी होहल्ला भएको र प्राधिकरणको हवाई सेफ्टी टिमले छानबिन गरिरहेकाले दुवैलाई थप दुई दिन उडान भर्न नदिने निर्णय भएको हो ।
जहाज इन्सिडेन्टमा परेयता सोमबारदेखि दुवै जनालाई उडान भर्न दिइएको छैन । पाइलट शेर्पाले उडान भरेको जहाज भने प्राविधिक चेकजाँचपछि मंगलबार बिहानदेखि नै सञ्चालनमा आएको छ । जहाजलाई रिलिज गरे पनि पाइलटलाई छानबिन नसकिएसम्म उडान भर्न नदिने निर्णय भएको प्राधिकरणले जनाएको छ ।
जहाज कुनै इन्सिडेन्टमा परेपछि पाइलटलाई केही समय उडान भर्न नदिने र अनुसन्धान गर्नुपर्ने अन्तर्राष्ट्रिय नागरिक उड्डयन संगठन (आइकाओ) को प्रावधान छ । सोहीअनुसार पाइलट र को–पाइलटलाई छोटो समयका लागि उडान भर्न नदिइएको प्राधिकरणका निमित्त महानिर्देशक राजकुमार क्षेत्रीले बताए ।,याे समाचार नयाँ पत्रिका दैनिकमा छापिएकाे छ ।
