२० असोज, विराटनगर ।
नेपाल भारत सीमा क्षेत्र विराटनगर रानीबाट प्रहरीले मानव खप्पर र हड्डी बरामद गरेको छ । भारतबाट नेपालतिर आइरहेको भ्यानबाट २८ वटा मानव खप्पर र हातखुट्टाका १० वटा हड्डी बरामद भएकाे हाे ।
सशस्त्र प्रहरी टोलीले मंगलबार रानीस्थित ढाटनजिक को२च ९६४८ नम्बरको भ्यान बेवारिस अवस्थामा देखेको र शंका लागेर जाँच मानव खप्पर र हड्डी फेला परेको सशस्त्र प्रहरी बल नेपाल नम्बर ३ कंकालनी गणका गणपति तीर्थ पौडेलले जानकारी दिए ।
बरामद भएका खप्परलाई बटुका जस्तो आकार बनाइएको छ । सुरुमा वन्यजन्तुको हड्डी भन्ने लागे पनि पछि मानव खप्पर र हातखुट्टाको हड्डी पुष्टि भएको पाैडेलले बताए । उनका अनुसार थप कारबाहीका लागि ती खप्पर, हड्डी र भ्यान इलाका प्रहरी रानीमा बुझाइएको छ ।
प्रहरीले भेनका चालक विराटनगर महानगरपालिका–१७ का विनोद राय र भेनमा रहेका झापाको दमक नगरपालिका–५ का ४३ वर्षीय युवराज कार्कीलाई नियन्त्रणमा लिएको छ । उनीहरुले सामान काठमाडौंँँ लैजाने तयारी रहेको बयान दिएका छन् ।
केका लागि यसको तस्करी भइरहेको भन्नेबारे अनुसन्धान भइरहेको जिल्ला प्रहरी कार्यालय मोरङका प्रमुख जनार्दन जीसीले बताए ।
