२१ असाेज, विराटनगर।
प्रदेश १ सरकारले प्रदेश निर्वाचन क्षेत्र विशेष कार्यक्रम सञ्चालन नियमावली २०७८लाई स्वीकृत गर्ने निर्णय गरेको छ । बुधबार साँझ मुख्यमन्त्री तथा मन्त्रिपरिषदको कार्यालय विराटनगरमा बसेको मन्त्रिपरिसद्को बैठकले उक्त निर्णय गरेको हो ।
प्रदेश निर्वाचन क्षेत्र पूर्वाधार विकास कार्यक्रम सञ्चालन नियमावली २०७८ लाई पनि स्वीकृत गर्ने निर्णय गरेको मुख्यमन्त्री भीम आचार्यको सचिवालयले जनाएको छ ।
त्यस्तै केही स्थानीय तहहरुको वडाको संख्या र सिमाना हेरफेर सम्बन्धि स्थानीय तहहरुले प्रस्ताव प्रदेशलाई गर्ने र प्रदेशले संघलाई सिफारिस गर्ने संबैधानिक प्रावधान अनुसार संखुवासभाको धर्मदेवी नगरपालिका, इलामको इलाम नगरपालिका,उदयपुरको बेलका नगरपालिका, धनकुटाको महालक्ष्मी गाउँपालिका र खोटाङको जन्तेढुङ्गा गाउँपालिकाले प्रस्ताव गरे अनुसार वडाको संख्या र सिमाना हेरफेरका लागि संघीय सरकारलाई सिफरिस गर्ने निर्णय गरेको छ । ती स्थानीय तहहरुले वडाको संख्या वृद्धि गर्न सिफारिस गरेका छन् ।
राजस्व स्रोत परिचालनका लागि कार्यदल गठन
त्यस्तै प्रदेशको राजस्वको श्रोत अत्यन्त न्यून भएकाले राजस्व श्रोत पहिचानका लागि ५ सदस्यीय उच्च स्तरीय राजस्व अनुसन्धान कार्यदल गठन गरेको छ । कार्यदलले प्रदेशको आन्तरिक राजस्वको श्रोत पहिचान, वृद्धि, सम्भावनाबारे अध्ययन गर्ने छ । बैठकले प्रदेश पर्यटन बोर्ड नियमावली २०७८ लाई स्वीकृत गरेको छ । नियमावली स्वीकृत भए पछि सरकारले चाँडैै प्रदेश पर्यटन बोर्ड गठन गर्ने तयारी रहेको जनाइएको छ ।
त्यस्तै उद्योग, वन, पर्यटन तथा वातावरण मन्त्रालय माताहतमा रहेका ६ जना अस्थायी कर्मचारीहरुको असार मसान्तसम्म म्याद थप्ने निर्णय गरेको छ । १४ वटै जिल्लामा विषयगत कार्यलय स्थापना गर्ने विषयमा मस्यौदा प्राप्त भएको र थप अध्ययन गरि अर्को बैठकले निर्णय कार्यालय स्थापनाको प्रकृया शुरु गरिने मन्त्रिपरिषदको कार्यालयले जनाएको छ । १४ जिल्लामा विषयगत कार्यालयस्थापनाको निर्णय यस अघि नै भइसकेको छ ।
