२४ कात्तिक, विराटनगर ।
विराटनगर महानगरपालिकाका मेयर भीम पराजुलीले छठ पर्वका अवसरमा १८औं पटकको दण्ड प्रणाम शुरु गरेका छन् । मेयर पराजुलीले विराटनगर-३ ठूलोमिल चोकस्थित शिव पाञ्चायान मन्दिरदेखि विराटनगर-१ सिंघीया खोला परोपकार घाटसम्मको साढे ३ किलोमिटरको दुरीमा घिस्रिएर दण्ड प्रणाम गरिरहेका छन् ।
विराटनगर महानगर, मुलुक सहित विश्वलाई नै कोरोनामुक्त गराउन छठी माता संग कामना गर्दै मेयर पराजुलीले दण्डवत प्रणाम पूजा गरेका हुन् ।कोभिड १९ को महामारीका कारण गतबर्ष भने उनले दण्ड प्रणाम गर्न सकेका थिएनन् ।
हिजो मंगलबार विधिपुर्वक खर्ना सकेर मेयर पराजुलीले आजदेखि निराहार छठ माताको ब्रत बसिरहेका छन् । ब्रतकै क्रममा उनले दण्ड प्रणाम गरेका हुन् । दण्ड प्रणाम सम्पन्न गर्न उनलाई करीव ५ घण्टाको समय लाग्नेछ ।
विगत १८ वर्ष देखि छठ पर्वको दिन यसरी दण्डवत पूजा गर्दै आएका मेयर भीम पराजुलीले विगतमा आफ्नो परिवार र आफन्तको सुख शान्ति र समृद्धिको कामना गर्दै पूजा गर्दै आएका थिए । उनले यसपटक कोरोना मुक्तीको कामना गरेको बताएका छन् ।
मेयर पराजुलीलाई उनका भतिजा प्रमिश पराजुलीले पनि ६ बर्षदेखि साथ दिंदै आएका छन् ।
