विराटनगर,साउन २२
संघीय सरकार र स्थानीय सरकारसंग समन्वय गर्दै एक नम्बर प्रदेश सरकार पर्यटन प्रवद्र्धनमा नितिगत योजनाका साथ अगाडि बढेको छ । प्रदेश सरकारले पर्यटन क्षेत्रको विकासका लागि प्रचलनमा आएका तथा प्रचलनमा नआएका पर्यटकीयस्थलहरुलाई दुुई भागमा वर्गीकरण गरी गुुरुयोजना वनाएको छ ।
पर्यटन प्रबद्धनका लागि छुट्याईएका प्रचलित स्थानहरुमा सगरमाथा, कञ्चनजङ्घा, मकालु, अमादब्लम, तिनजुरे मिल्के लालीगुराँस, चताराधाम, पाथिभरा माता, हलेशी महादेव रहेका छन् भने यी स्थलहरुलाई भौतिक पुर्वाधारदेखि पदमार्गको विकास आर्थिक वर्ष २०७५/७६ को बजेटमै राखिएको प्रदेश नं. १ उद्योग पर्यटन वन तथा वातावरण मन्त्रालयका प्रमुख स्वकीय सचिव विष्णुकुमार यादवले जानकारी दिए ।
त्यस्तै लामो समयदेखि ओझेलमा परेका ऐतिहासिक र धार्मिक पर्यटकीय स्थललाई व्यवस्थित गर्नेगरी योजना अघि सारिएको छ । प्रचलनमा आउन नसकेका स्थानहरुमा विराटनगरको विराट राजा दरबार, सुनसरीको वर्जु ताल , कोशी टप्पु, धरानको दन्तकाली,बुुढासुब्बा,पिण्डेश्वर, धनकुटाको भेडेटार,नमस्ते झरना ,पाख्रिबास छन् भने पाँचथरको गुरु फाल्गुनन्द र लब्रुकुटी, संखुवासभाको सभापोखरी, उदयपुरको रौतामाई पनि यसै अन्तर्गत रहेका छन् ।
यी प्रचलनमा आउन नसकेका क्षेत्रहरुलाई प्रदेश सरकारले आ.व. २०७५÷७६ मा अध्ययन तथा डीपीआर गर्ने योजनामा राखेको छ । यस्ता स्थलहरुलाई प्रदेश १ को सर्वोत्कृष्ट स्थलको रुपमा ल्याउन प्रदेश मन्त्रालयको योजनामा राखिएको जनाईएको छ । केन्द्रीय सरकारसँग सहकार्य गर्दै ती स्थलहरुलाई नमुना प्रदेश ब्राण्ड बनाउने लक्ष्य प्रदेश सरकारले लिएको छ । ब्राण्डका स्थलहरुमा आन्तरिक र बाह्य पर्यटकलाई आकर्षित र ब्यबस्थित बनाउन पर्यटक प्रहरीलाई सञ्चालन गर्नुपर्ने, पर्यटक गाईडको ब्यबस्था,होटेलको ब्यबस्था हुनुपर्ने साथै स्वस्थ्य हावापानी हुनुपर्ने उपायहरु अबलम्बन गर्नुपर्ने जनाईएको छ ।
प्रदेश सरकारले महिला, मधेशी, आदिवासी, जनजाति, लगायत विपन्न समूहलाई पनि पर्यटन ब्याबसायीको रुपमा ल्याउन ग्रामिण पर्यटनलाई पर्यटन ब्यबसायकोरुपमा अगाडि बढाउने विश्वास लिएको छ ।प्रदेश सरकारले पर्यटन ब्यबसायको बजारीकरणका लागि आधुनिक सुचना प्रणाली ल्याउने जनाएको छ भने प्रदेश नम्बर १ मा दैनिक रुपमा आउने पर्यटकहरुको डाटा कलेक्सन गरी त्यसअनुसार आवश्यक क्रियाकलापहरु गर्ने जनाएको स्वकीय सचिव यादवले बताए ।
